निवडणूकीसाठी महापालिका प्रशासन सज्ज

निवडणुकीसाठी महापालिका प्रशासन सज्ज
आयुक्तांच्या कर्मचाऱ्यांना महत्वाच्या सूचना
भाईंदर, ता. १६ (बातमीदार) : आगामी मिरा-भाईंदर महानगरपालिकेच्या निवडणुकीसाठी प्रशासन सज्ज झाले आहे. महापालिकेची मुदत संपल्यानंतर सुमारे साडेतीन वर्षांनी निवडणूक होऊ घातली आहे. १५ डिसेंबरला सायंकाळी निवडणुकीची आचारसंहिता लागू झाल्यानंतर आयुक्त राधाबिनोद शर्मा यांनी प्रशासनाची बैठक घेतली व निवडणूक सुरळीत पार पडण्याच्या दृष्टीने आवश्यक त्या सूचना अधिकाऱ्यांना दिल्या.
बैठकीत शहरात लागलेले राजकीय फलक, होर्डिंग तातडीने उतरविण्याचे आदेश आयुक्तांनी दिले आहेत. त्यानुसार प्रत्येक प्रभागात कर्मचाऱ्यांनी कारवाई सुरू केली आहे. निवडणुकीसाठी घालून देण्यात आलेल्या मार्गदर्शक तत्त्वांचे तंतोतंत पालन होईल आणि आचारसंहितेचा भंग होणार नाही, याची दक्षता घेण्याच्या सूचनाही आयुक्तांनी दिल्या आहेत.
आगामी निवडणुकीसाठी प्रशासनाने सुरुवातीला नऊ निवडणूक निर्णय अधिकाऱ्यांची नेमणूक केली होती, मात्र निवडणूक आयोगाने ते कमी करून निवडणूक निर्णय अधिकाऱ्यांची संख्या आता सात केली आहे. मिरा-भाईंदर महानगरपालिकेचे एकंदर २४ प्रभाग आहेत. त्यामुळे प्रत्येक निवडणूक निर्णय अधिकाऱ्याअंतर्गत तीन ते चार प्रभाग येणार आहेत, तर मतदानाच्या दुसऱ्याच दिवशी मतमोजणी असल्याने आयुक्तांनी या सर्व केंद्राची पाहणी करून आवश्यक त्या सूचना केल्या आहेत.

एक खिडकी योजना सुरू होणार
इच्छुक उमेदवारांसाठी प्रत्येक विभागात निवडणूक निर्णय अधिकारी कार्यालयात एक खिडकी योजना सुरू केली जाणार आहे. याशिवाय महापालिका मुख्यालयातही मध्यवर्ती एक खिडकी योजना सुरू होणार आहे. उमेदवारांना हवे असलेले सर्व प्रकारचे दाखले या ठिकाणी दिले जाणार आहेत, मात्र उमेदवार महापालिकेचा कंत्राटदार नसल्याचा दाखला देण्यास आयुक्तांनी मनाई केली आहे. त्यासंदर्भात उमेदवाराला स्वयंघोषणा पत्र दाखल करावे लागणार आहे.

एकूण मतदार - ८, १९,१५१

पुरुष मतदार - ४, ३३,०५३

स्त्री मतदार - ३, ८६,०७८

इतर - २०

एकूण प्रभागसंख्या - २४

सदस्यसंख्या - ९५

एकूण मतदान केंद्र - ९७६, ठिकाणे - १९८

निवडणुकीसाठी आवश्यक मनुष्यबळ - ६३६०

यापूर्वी झालेली निवडणुक - २० ऑगस्ट २०१७
------------------
२०१७ चे राजकीय बलाबल

भाजप - ६१

शिवसेना - २२

काँग्रेस - १२