भिवंडी पूर्वेत २०.२७ कोटींची विकासकामे

भिवंडी, ता. १६ (वार्ताहर) : भिवंडी पूर्व विधानसभेचे आमदार रईस शेख यांनी सरकार स्तरावर पाठपुरावा करून मंजूर झालेल्या २० कोटी २७ लाख रुपयांच्या विविध विकासकामांचे भूमिपूजन व लोकार्पण जाहीर केले आहे. याबाबतची माहिती त्यांनी पत्रकार परिषदेत दिली.
आमदार रईस शेख यांनी १६ व १७ डिसेंबरला शहरातील पद्मानगर, शांतीनगर, फातिमानगर; तसेच सिराजूल कब्रस्तान परिसरात विविध विकासकामांचे भूमिपूजन व लोकार्पण होणार होते. मात्र, महाराष्ट्र राज्य निवडणूक आयोगाकडून सोमवारी सायंकाळी चार वाजता पत्रकार परिषद होणार असल्याने आमदार रईस शेख यांनी जनसंपर्क कार्यालयात दुपारी तीन वाजता या सर्व विकासकामांचे भूमिपूजन व लोकार्पण प्रतिकात्मक स्वरूपात जाहीर केले. या वेळी समाजवादी पक्षाचे प्रदेश उपाध्यक्ष अजय यादव, सलाम नोमानी तसेच पक्षाचे पदाधिकारी व कार्यकर्ते मोठ्या संख्येने उपस्थित होते. भिवंडी पूर्व विधानसभा मतदारसंघाचा सर्वांगीण विकास करून नागरिकांना अधिक चांगल्या नागरी सुविधा उपलब्ध करून देण्याचा आमचा सातत्यपूर्ण प्रयत्न असल्याचे आमदार शेख यांनी सांगितले. आगामी महापालिका निवडणुकीत समाजवादी पक्ष मोठा विजय संपादन करेल, असा विश्वासही त्यांनी व्यक्त केला. दरम्यान, विधानसभा हिवाळी अधिवेशनात भिवंडी शहराशी संबंधित अनेक महत्त्वांचे प्रश्न उपस्थित करून सरकारचे लक्ष वेधण्यात आपण यशस्वी झाल्याचे आमदार शेख यांनी स्पष्ट केले.

रुंदीकरणासाठी मोबदला द्यावा
भिवंडी शहरात सुरू असलेल्या रस्ता रुंदीकरणाच्या कामामुळे बाधित होणाऱ्या नागरिकांकडून मंजूर संघर्ष समितीच्या माध्यमातून आमदार रईस शेख यांच्यावर टीका करण्यात येत आहे. आमदार शेख हे बिल्डरधार्जीणे धोरण राबवत असल्याचा आरोपही या समितीकडून करण्यात आला आहे. या आरोपांबाबत विचारणा केली असता शेख यांनी आपली भूमिका स्पष्ट केली. शहरातील रस्ता रुंदीकरण हे शहराच्या विकासासाठी अत्यावश्यक आहे. विकास करताना बाधितांवर अन्याय होऊ नये, यासाठी योग्य मोबदल्याची मागणी सातत्याने करत असल्याचे त्यांनी स्पष्ट केले. मुंबई महानगर प्रदेश विकास प्राधिकरण (एमएमआरडीए)च्या धर्तीवर भिवंडीतील रस्ता रुंदीकरणामुळे बाधित होणाऱ्या नागरिकांना मोबदला देण्यात यावा, यासाठी आपण मुख्यमंत्र्यांकडे मागणी केली आहे. विधानसभेतही हा मुद्दा उपस्थित केल्याची आठवण आमदार शेख यांनी करून दिली.