लोकअदालतीत भिवंडी वाहतूक विभागाला यश

भिवंडी, ता. १६ (वार्ताहर) : राष्ट्रीय लोकअदालतीच्या माध्यमातून प्रलंबित वाहतूक दंड प्रकरणांचा निपटारा करण्यात येत असताना भिवंडी न्यायालयात शनिवारी (दि. १३) लोकअदालतीदरम्यान वाहतूक विभागाला मोठे यश मिळाले आहे. भिवंडी सहाय्यक पोलिस आयुक्त कार्यालयाच्या अखत्यारीत येणाऱ्या वाहतूक शाखांकडून एकूण १९ लाख ४६ हजार रुपयांचा दंड वसूल करण्यात आला.

भिवंडी सहाय्यक पोलिस आयुक्त कार्यालयांतर्गत शहर, नारपोली आणि कोनगाव अशा तीन वाहतूक शाखांचा समावेश आहे. या तिन्ही शाखांनी लोकअदालतीत एकूण २३३३ प्रलंबित दावे निकाली काढत सरकारच्या तिजोरीत १९ लाख ४६ हजार रुपयांचा दंड जमा केला. यामध्ये नारपोली वाहतूक शाखेने सर्वाधिक १११५ दावे निकाली काढत आठ लाख ७७ हजार २०० रुपयांचा दंड वसूल केला आहे. त्या खालोखाल भिवंडी वाहतूक शाखेने ८०२ दाव्यांमधून सहा लाख ७१ हजार २०० रुपये दंड वसूल केला, तर कोनगाव वाहतूक शाखेने ४१६ दावे निकाली काढत तीन लाख ९७ हजार २०० रुपयांची दंडरक्कम जमा केली आहे.
लोकअदालतीच्या माध्यमातून नागरिकांना तडजोडीच्या माध्यमातून दंड प्रकरणे निकाली काढण्याची संधी मिळाली आहे. एकाच दिवशी मोठ्या प्रमाणावर प्रलंबित दावे निकाली निघाल्याने वाहतूक विभागाच्या कामकाजालाही गती मिळाली आहे.

वाहतूक शाखा दावे रक्कम
कोनगाव ४१६ ३,९७,२००
नारपोली. १११५ ८,७७,६००
भिवंडी ८०२ ६,७१,२००
--------
एकूण २३३३ १९,४६,०००