पनवेलमधील अवैध जाहिरातींना लगाम

पनवेलमधील अवैध जाहिरातींना लगाम
आचारसंहिता लागू होताच पनवेल पालिकेची धडक कारवाई
पनवेल, ता. १६ (बातमीदार) : निवडणूक आचारसंहिता लागू होताच पनवेल महापालिकेने शहरातील अवैध होल्डिंग, बॅनर व फ्लेक्स हटवण्यासाठी तातडीची आणि प्रभावी मोहीम हाती घेतली. आचारसंहितेचे काटेकोर पालन व्हावे, तसेच शहराचे सौंदर्य व वाहतुकीची शिस्त अबाधित रहावी, या उद्देशाने पालिकेने रात्री उशिरापर्यंत विविध भागांत धडक कारवाई केली. या कारवाईमुळे पनवेल शहर अधिक स्वच्छ, मोकळे व देखणे दिसू लागले आहे.
गेल्या काही महिन्यांत शहर व उपनगरांमध्ये अवैध जाहिरातींचा मोठ्या प्रमाणावर सुळसुळाट झाला होता. रस्त्यांच्या दुतर्फा, चौकांमध्ये, उड्डाणपुलांवर तसेच सार्वजनिक ठिकाणी लावलेल्या बॅनरमुळे वाहतुकीस अडथळे निर्माण होत होते. काही ठिकाणी चालकांचे लक्ष विचलित होऊन अपघाताचा धोका वाढल्याच्या तक्रारीही नागरिकांकडून करण्यात येत होत्या. यासोबतच शहराच्या सौंदर्यावरही या जाहिरातींमुळे विपरीत परिणाम होत होता. आचारसंहिता जाहीर झाल्यानंतर पनवेल महापालिकेच्या अधिकाऱ्यांनी व कर्मचाऱ्यांनी तत्काळ कारवाईला सुरुवात करत विविध प्रभागांमध्ये अवैध होल्डिंग हटवले. काही प्रमुख चौक, मुख्य रस्ते व उड्डाणपुलांवरून मोठ्या प्रमाणावर बॅनर व फ्लेक्स काढण्यात आले. त्यामुळे रस्ते मोकळे झाले असून, नागरिकांना दिलासा मिळाला आहे.
...............
दंडात्मक कारवाई होणार
पालिकेने यापुढेही अवैध जाहिराती लावणाऱ्यांवर कडक कारवाई केली जाईल, असा स्पष्ट इशारा दिला आहे. नियमांचे उल्लंघन करणाऱ्यांवर दंडात्मक कारवाई करण्यात येणार असल्याचेही प्रशासनाने नमूद केले. ‘स्वच्छ पनवेल, सुंदर पनवेल’ ही संकल्पना प्रत्यक्षात उतरत असल्याने नागरिकांकडून पालिकेच्या या मोहिमेचे स्वागत करण्यात येत आहे. शहर स्वच्छ, शिस्तबद्ध व सुरक्षित ठेवण्यासाठी नागरिकांनीही सहकार्य करावे, असे आवाहन पनवेल महापालिकेच्या वतीने करण्यात आले आहे.