कोप्रोली व चिरनेर मार्गावर वाहतूक कोंडी

कोप्रोली व चिरनेर मार्गावर वाहतूक कोंडी
आठवडा बाजार व अतिक्रमणामुळे गर्दी वाढली; विद्यार्थी व नोकरवर्ग हैराण
उरण, ता. १६ (वार्ताहर) : उरण तालुक्यातील द्रोणागिरी वसाहत पूर्व विभागातील कोप्रोली व चिरनेर नाका हे परिसरातील अत्यंत महत्त्वाचे मार्ग मानले जातात, मात्र या ठिकाणी भरवण्यात येणारा आठवडा बाजार, रस्त्यांवरील अतिक्रमणे आणि सायंकाळच्या वेळेस सुरू असलेली अवजड वाहतूक यांमुळे तीव्र वाहतूक कोंडी निर्माण होत आहे. परिणामी नागरिक, विद्यार्थी व नोकरवर्ग प्रचंड त्रस्त झाला आहे.
कोप्रोली नाका व चिरनेर नाका हे परिसरातील खरेदी-विक्रीची प्रमुख केंद्रे असल्याने येथे महिला व नागरिकांची मोठी गर्दी असते. मंगळवार व शुक्रवार या दिवशी भरवण्यात येणाऱ्या आठवडा बाजारामुळे गर्दी आणखी वाढते. बाजारासाठी रस्त्यावरच दुकाने व खाद्यपदार्थांचे स्टॉल लावले जात असल्याने वाहतुकीला मोठा अडथळा निर्माण होतो. अनेक वाहने रस्त्यावरच उभी राहत असल्याने कोंडी अधिकच वाढते.
विशेष म्हणजे या परिसरात अधिकृत व अनधिकृत गोदामे तसेच रिकामे कंटेनर यार्ड असल्याने अवजड वाहनांची ये-जा याच अरुंद व गजबजलेल्या मार्गावरून होते. त्यामुळे सायंकाळच्या वेळेस शाळेतून घरी परतणारे विद्यार्थी आणि कामावरून परतणारे कामगार अनेकदा दोन ते तीन तास वाहतूक कोंडीत अडकून पडतात.
या पार्श्वभूमीवर द्रोणागिरी, कोप्रोली व चिरनेर मार्गांवरील आठवडा बाजार बंद करून अतिक्रमणे हटवावीत तसेच सायंकाळच्या वेळेत अवजड वाहतुकीवर निर्बंध घालावेत, अशी जोरदार मागणी स्थानिक नागरिकांकडून करण्यात येत आहे.