उघड्या नाल्याने घेतला चिमुकल्याचा बळी

डोंबिवली, ता. १६ : पश्चिमेतील जगदंबा माता मंदिर परिसरात नवरात्रोत्सवाच्या काळात उघड्या नाल्यात पडून आयुष कदम या अल्पवयीन मुलाचा मृत्यू झाल्याच्या गंभीर घटनेची मुंबई उच्च न्यायालयाने दखल घेतली असून, संबंधित प्रशासनातील अधिकारी व ठेकेदारांकडून मृत मुलाच्या कुटुंबीयांना सहा लाख रुपयांची भरपाई देण्याचे आदेश दिले आहेत. या आदेशानंतर तब्बल तीन महिन्यांनी महापालिकेने अज्ञात व्यक्तीविरुद्ध गुन्हा दाखल करण्याची प्रक्रिया सुरू केली आहे.
ही दुर्घटना सप्टेंबरमध्ये मुसळधार पावसात घडली होती. घटनास्थळ कल्याण-डोंबिवली महापालिकेच्या हद्दीत असले तरी त्या ठिकाणी एमएमआरडीएच्या वतीने बाह्यवळण रस्त्याच्या कामासाठी नाल्यावर पूल बांधण्याचे काम सुरू होते. अवजड वाहनांच्या सततच्या वर्दळीमुळे नाल्याचे झाकण तुटले होते. सुरक्षेसाठी अडथळे उभारण्यात आले होते; मात्र नवरात्रोत्सवाच्या काळात पुरेशा प्रकाशाची व सुरक्षिततेच्या उपाययोजनांची कमतरता असल्याने ही घटना घडल्याचे नागरिकांनी सांगितले. घटनेनंतर स्थानिकांनी आयुषला वाचविण्याचा प्रयत्न केला; मात्र प्रवाहात तो वाहून गेला. उच्च न्यायालयाच्या आदेशानुसार मलनिस्सारण विभागाचे उपअभियंता लिलाधर नारखेडे यांनी विष्णुनगर पोलिस ठाण्यात तक्रार दाखल केली असून, पोलिसांनी अज्ञाताविरुद्ध गुन्हा नोंदविला आहे. या प्रकरणात जबाबदारी निश्चित करून दोषींवर कठोर कारवाई करावी, अशी मागणी नागरिक व सामाजिक कार्यकर्त्यांकडून होत आहे.