के. व्ही. शाळेत ५३वे तालुकास्तरीय विज्ञान प्रदर्शन

तालुकास्तरीय विज्ञान प्रदर्शन उत्साहात
जव्हार, ता. १७ (बातमीदार) : विद्यार्थ्यांमध्ये विज्ञान आणि तंत्रज्ञानाची आवड निर्माण करण्यासाठी पंचायत समिती शिक्षण विभागातर्फे आयोजित ५३वे तालुकास्तरीय विज्ञान प्रदर्शन बुधवारी (ता. १७) शहरातील के. व्ही. हायस्कूलमध्ये झाले. या प्रदर्शनाचे उद्घाटन गटविकास अधिकारी संदेश दुमाडा यांच्या हस्ते करण्यात आले.
या वेळी विद्यार्थ्यांना प्रोत्साहित करताना संदेश दुमाडा यांनी मोखाडा तालुक्यातील शिक्षकाच्या मुलाने ‘इस्रो’मध्ये मिळवलेल्या यशाचा दाखला दिला. जव्हारमधील विद्यार्थ्यांनीही अशाच प्रेरणेने जागतिक स्तरावर झेप घ्यावी, अशी आशा त्यांनी व्यक्त केली. युनिव्हर्सल शाळेचे सचिव हर्षद मेघपुरिया यांनीही विद्यार्थ्यांना विज्ञान तंत्रज्ञानातील विविध संदर्भ देऊन प्रेरित केले.
या प्रदर्शनात जव्हार तालुक्यातील प्राथमिक आणि माध्यमिक गटातील विद्यार्थ्यांनी एकूण १०३ हून अधिक प्रयोग सादर केले. कार्यक्रमाच्या यशस्वी आयोजनासाठी गटशिक्षण अधिकारी विजया टाळकुटे, शिक्षण विस्तार अधिकारी, मुख्याध्यापक आणि शिक्षकांनी विशेष परिश्रम घेतले. कवी रवी बुधर यांनी कार्यक्रमाचे सूत्रसंचालन केले.
प्राथमिक गटात ६८ प्रकल्प तर माध्यमिक गटात ३५ प्रकल्पाच्या माध्यमातून एकूण ३७८ विद्यार्थी सहभागी झाले होते. यामध्ये शिक्षक व लॅब परिचर साहित्याचे नऊ प्रकल्पही होते. सुमारे ३५२ विद्यार्थ्यांनी प्रदर्शनास भेट दिली.