मालवणीत रस्त्यावरच पडलेले डेब्रिज; वाहतूक कोंडीत भर

मालवणीत रस्त्यावरच पडलेले डेब्रिज; वाहतूक कोंडीत भर
मालाड, ता. १८ (बातमीदार) ः मालाड येथील मालवणी गेट क्रमांक ८ परिसरात मागील काही दिवसांपासून रस्त्यावर मोठ्या प्रमाणात डेब्रिज पडून असल्याने वाहतूक कोंडीची समस्या तीव्र झाली आहे. मालवणी गेट क्रमांक ८, शहीद अब्दुल हमीद रोडवरील बेस्ट आगारासमोर रस्त्यावर साचलेले डेब्रिज हटवले नसल्याने रस्ता अरुंद झाला असून, येथून ये-जा करणाऱ्या वाहनचालकांना मोठा त्रास सहन करावा लागत आहे.
सध्या म्हाडा वसाहत ते अंबोजवाडी दरम्यान काँक्रीट रस्त्याचे काम सुरू असल्याने संबंधित रस्ता बंद करण्यात आला आहे. त्यामुळे पर्यायी मार्ग म्हणून या ठिकाणाहून मोठ्या प्रमाणात वाहतूक वळवण्यात आली असून, वाहनांची वर्दळ वाढली आहे. त्यातच रस्त्यावर पडलेल्या डेब्रिजमुळे वाहतूक संथ होत असून, कोंडीत प्रचंड भर पडत आहे. या परिस्थितीमुळे वाहनचालकांसह पादचाऱ्यांनाही नाहक त्रास सहन करावा लागत आहे. सततच्या वाहतूक कोंडीमुळे वाहनचालकांकडून हॉर्नचा अतिवापर होत असून, त्यामुळे ध्वनिप्रदूषणात वाढ होत आहे. तसेच वाहनांच्या धुरामुळे वायुप्रदूषणही वाढत असल्याचे स्थानिक नागरिकांचे म्हणणे आहे. विशेषतः दमा व श्वसनविकार असलेल्या रुग्णांना याचा मोठा त्रास होत असल्याचेही सांगण्यात आले.
पालिकेने तातडीने लक्ष देऊन रस्त्यावर पडलेले डेब्रिज हटवावे व रस्ता वाहतुकीसाठी मोकळा करावा, अशी जोरदार मागणी स्थानिक नागरिकांकडून करण्यात येत आहे.