बोर्डी-उंबरगाव परिसरातील रुग्णांसाठी ''अस्थिरोग चिकित्सा केंद्र'' कार्यान्वित

बोर्डी-उंबरगाव परिसरातील रुग्णांसाठी अस्थिरोग चिकित्सा केंद्र कार्यान्वित
बोर्डी, ता. १८ (बातमीदार) : बोर्डी आणि परिसरातील अस्थिरोगाच्या रुग्णांना आता मुंबई किंवा सुरत येथे जाण्याची गरज भासणार नाही. मुंबईतील नामवंत तज्ज्ञ डॉ. अजय राठोड यांनी उंबरगाव येथील नारायण पार्क येथे स्वतःचे चिकित्सा केंद्र सुरू केले असून, गुरुवारी (ता. १८) त्याचे उद्घाटन उत्साहात पार पडले.
डॉ. अजय राठोड हे मूळचे घोलवड गावचे रहिवासी आहेत. ग्रामीण भागातील आणि गोरगरीब रुग्णांना मुंबईत जाऊन उपचार घेणे खर्चिक आणि त्रासाचे ठरत होते. ही गैरसोय दूर करण्यासाठी त्यांनी आपल्या जन्मभूमीच्या परिसरात सेवा देण्याचा निर्णय घेतला आहे. हे केंद्र आठवड्यातून शुक्रवार, शनिवार आणि रविवार असे तीन दिवस रुग्णांसाठी खुले राहणार आहे. या उपक्रमामुळे स्थानिक रुग्णांची मोठी गैरसोय दूर झाली असून, मुंबईतील अनुभवाचा उपयोग ग्रामीण भागातील रुग्णांच्या सेवेसाठी करणार आहे, असा विश्वास डॉ. राठोड यांनी या वेळी व्यक्त केला. या केंद्राच्या शुभारंभामुळे स्थानिक नागरिकांमध्ये आनंदाचे वातावरण आहे.