निलंबनाच्या निर्णयाविरोधात महसूल कर्मचाऱ्यांचा एल्गार मुख्यमंत्र्यांना निवेदन

महसूल कर्मचाऱ्यांचे आजपासून राज्यव्यापी कामबंद आंदोलन
पालघर, ता. १८ : महसूलमंत्र्यांनी विधिमंडळात महसूल अधिकारी व कर्मचाऱ्यांच्या निलंबनाच्या केलेल्या घोषणांमुळे संपूर्ण राज्यात महसूल विभागात तीव्र संतापाची लाट उसळली आहे. या एकतर्फी कारवाईच्या निषेधार्थ महाराष्ट्र राज्य महसूल अधिकारी कर्मचारी समन्वय महासंघाने शुक्रवारपासून (ता. १९) राज्यव्यापी कामबंद आंदोलनाची घोषणा केली आहे.
पालघर जिल्ह्यातही तलाठी आणि मंडळ अधिकाऱ्यांचे निलंबन झाल्याने स्थानिक संघटनांनी या आंदोलनाला पूर्ण पाठिंबा दिला आहे. कोणतीही पूर्वचौकशी न करता थेट निलंबन केले जात असल्याने कर्मचारी दहशतीच्या वातावरणात काम करत असल्याचा आरोप संघटनेने केला आहे. या संदर्भात मुख्यमंत्री देवेंद्र फडणवीस यांना निवेदन देऊन तातडीने हस्तक्षेप करण्याची मागणी करण्यात आली आहे. महसूल विभाग प्रशासनाचा कणा आहे; मात्र अशा कारवाईमुळे कर्मचाऱ्यांचे खच्चीकरण होत आहे, असे महासंघाने म्हटले आहे. प्रलंबित आर्थिक मागण्या आणि या नवीन संकटामुळे महसूल कर्मचारी आक्रमक झाले असून, शुक्रवारपासून होणाऱ्या आंदोलनामुळे राज्यातील महसूल कामकाजावर मोठा परिणाम होण्याची शक्यता आहे.