अतुल भगत यांना पदावरून काढल्याने दोन तालुकाप्रमुखांसह 33 पदाधिकाऱ्यांचे राजीनामे

अतुल भगत यांना पदावरून काढल्याने दोन तालुकाप्रमुखांसह ३३ पदाधिकाऱ्यांचे राजीनामे

उरण, ता. १८ (वार्ताहर) ः उरण शिवसेना शिंदे गटात मोठ्या हालचाली घडत असून, उरण विधानसभा जिल्हाप्रमुख अतुल भगत यांना हटवून त्यांच्या ठिकाणी विनोद साबळे यांची जिल्हाप्रमुख म्हणून नियुक्ती करण्यात आली आहे. त्यामुळे उरण तालुकाप्रमुख दीपक ठाकूर, पनवेल तालुकाप्रमुख रघुनाथ पाटील, यांनीदेखील आपल्या तालुकाप्रमुखपदाचा राजीनामा शिवसेना सचिव संजय मोरे यांच्याकडे दिला आहे. तसेच त्यांच्या समवेत अन्य ३३ पदाधिकऱ्यांनी आपल्या पदाचा राजीनामा दिला आहे.
नुकत्याच पार पडलेल्या उरण नगर परिषदेची निवडणूक ही उलथापालथ घडविण्यास कारणीभूत असल्याची चर्चा सध्या जोर धरत आहे. नगर परिषद निवडणुकीत शिवसेनेने भाजपाशी युती न करता स्वतंत्र उमेदवार उभे करून निवडणूक लढविली होती. त्या वेळी प्रचारात एकमेकांनी जोरदार टीका टिप्पणी केली होती. त्यामुळे वरिष्ठ पातळीवर युतीमध्ये तणाव निर्माण झाला होता. भाजप श्रेष्ठींनी याबाबत शिवसेनेच्या वरिष्ठांकडे तक्रार केली होती, तर राजीनामा दिलेले तालुकाप्रमुख दीपक ठाकूर यांनी सांगितले की, कर्जतचे आमदार महेंद्र थोरवे यांच्यामुळे अतुल भगत यांना बाजूला करण्यात आले असल्यामुळे आपणसुद्धा तालुकाप्रमुखपदाचा राजीनामा दिला.