लोकसहभागातून लोखंडी पाड्यात उभारला वनराई बंधारा

लोकसहभागातून लोखंडी पाड्यात उभारला वनराई बंधारा;
बोईसर, ता. २४ (वार्ताहर) : ग्रामीण भागातील पाणीटंचाईवर मात करण्यासाठी आणि भूजल पातळी वाढवण्यासाठी बोईसर ग्रामपंचायतीने पुढाकार घेतला आहे. ''मुख्यमंत्री समृद्ध पंचायत अभियाना''अंतर्गत लोखंडी पाडा परिसरात बुधवारी (ता. २४) लोकसहभाग आणि श्रमदानातून वनराई बंधारा उभारण्यात आला.
पाणी बचतीचा संदेश देत ग्रामस्थ, लोकप्रतिनिधी आणि ग्रामपंचायत प्रशासनातील कर्मचारी या मोहिमेत मोठ्या संख्येने सहभागी झाले होते. या बंधाऱ्यामुळे पावसाचे पाणी अडवून ते जमिनीत जिरवण्यास मदत होईल, ज्यामुळे उन्हाळ्यातील पाणीटंचाईची तीव्रता कमी होणार आहे. श्रमदान मोहिमेत सरपंच दिलीप धोडी, उपसरपंच निलम संखे, ग्रामविकास अधिकारी कमलेश संखे, माजी सरपंच मनोज मोर आणि विविध ग्रामपंचायत सदस्यांनी प्रत्यक्ष सहभाग नोंदवून योगदान दिले. "गावाचा विकास आणि पाण्याचे योग्य नियोजन ही सर्वांची सामूहिक जबाबदारी आहे," अशी भावना याप्रसंगी ग्रामविकास अधिकारी कमलेश संखे यांनी व्यक्त केली. लोखंडी पाडा येथील नागरिकांच्या उत्स्फूर्त प्रतिसादामुळे हा उपक्रम यशस्वी ठरला.