बिबट्याच्या हल्ल्यात बैल ठार

बिबट्याच्या हल्ल्यात बैल ठार
नरपड-आंबेवाडीतील प्रकार, ग्रामस्थ दहशतीत
कासा, ता.२४ (बातमीदार)ः डहाणू तालुक्यात बिबट्याचा वाढता वावरामुळे भीतीचे वातावरण आहे. नरपड-आंबेवाडी परिसरात काही दिवसांपूर्वी दोन वासरे मारली असताना बिबट्याच्या हल्ल्यात बैल ठार झाल्याने वनविभाग सतर्क झाला आहे.
नरपड-आंबेवाडी येथील संतोष पाटील यांच्या शेतात ही घटना घडली. या हल्ल्यात बिबट्याने बैलाच्या मानेकडील भाग खाल्ल्याचे पंचनाम्यात स्पष्ट झाले आहे. घटनेची माहिती मिळताच वनविभागाचे पथक सोमवारी सकाळी घटनास्थळी दाखल झाले. पंचनामा करून वरिष्ठ अधिकाऱ्यांकडे अहवाल सादर करण्यात आला आहे. या परिसरात बिबट्याचे पूर्वीपासून वास्तव्य आहे. त्यामुळे शेतकरी, ग्रामस्थांनी रात्रीच्या वेळी बाहेर जाणे टाळावे, जनावरे सुरक्षित ठिकाणी बांधावीत, एकटे फिरणे टाळावे तसेच लहान मुलांची विशेष काळजी घ्यावी, असे आवाहन करण्यात आले आहे.
--------------------------
वनविभागाकडून गस्त
धामणी धरण परिसरात दोन महिन्यांपूर्वी बिबट्याचे दर्शन झाले होते. त्यानंतर जलद कृती दल सज्ज ठेवण्यात आले होते. बिबट्यांच्या हालचालींवर सतत लक्ष ठेवले जात आहे. नागरिकांमध्ये जनजागृतीही सुरू आहे. पण काही समाजकंटकांकडून एआय तंत्रज्ञानाचा वापर करून बनावट फोटो, व्हिडिओ समाजमाध्यमांवर पसरवले जात असल्याने अफवा पसरवणाऱ्यांवर कारवाई करण्याचा इशारा वनपाल अशोक उत्तेकर यांनी दिला आहे.