तळीरामांवर पोलिसांची नजर

तळीरामांवर पोलिसांची नजर
मिरा-भाईंदरमध्ये ठिकठिकाणी नाकाबंदी
भाईंदर, ता.२४(बातमीदार): नाताळ सण, आगामी नववर्षाचे स्वागतासाठी मिराभाईंदरमध्ये वाहतूक पोलिसांकडून विशेष तयारी करण्यात आली आहे. याच अुषंगाने तळीरामांवर करडी नजर ठेवण्यात येणार असून वाहनचालकांवर गुन्हे दाखल केले जाणार आहेत.
नववर्षाचे स्वागतही मोठ्या उत्साहात केले जात असते. यादरम्यान मद्यप्राशन करुन वाहन चालविणाऱ्यांच्या संख्येत मोठी वाढ होते. मद्यप्राशन करुन वाहन चालवल्यास अपघात होण्याची भीती असते. अशा मद्यपी चालकांना रोखण्यासाठी वाहतूक पोलिसांकडून जोरदार तयारी करण्यात आली आहे.
२५ डिसेंबर ते ३१ डिसेंबर या दरम्यान वाहतूक पोलिसांकडून वरसावे, दहिसर, मिरा रोड येथील एस के स्टोन, भाईंदर पूर्व येथील गोल्डन नेस्ट, भाईंदर पश्चिम येथील मॅक्सस मॉल नाका येथे नाकाबंदी करण्यात येणार आहे. तसेच एक उपनिरिक्षक, चार पोलिस कर्मचारी तैनात राहणार आहेत.
-----------------------------
दंड वसूल करणार
सायंकाळी ६ ते रात्री १०.३० या कालावधीत ही नाकाबंदी केली जाणार आहे. प्रत्येक ठिकाणी ड्रंक अँड ड्राईव्हचे गुन्हे दाखल केले जाणार आहेत. तसेच वाहतुकीचे नियम मोडणाऱ्यावर दंड वसूल करण्याचे आदेश दिल्याचे वाहतूक विभागाचे सहाय्यक आयुक्त सतीश शिवरकर यांनी सांगितले.