देशातील पहिला टेली-रोबोटिक सर्जरी उपक्रम दूरस्थ भागांत पोहोचणार जागतिक दर्जाची शस्त्रक्रिया सेवा

देशातील पहिला टेली-रोबोटिक सर्जरी उपक्रम
मुंबई, ता. २६ : सर एच. एन. रिलायन्स फाउंडेशन रुग्णालय (एचएनआरएफएच), धीरूभाई अंबानी ऑक्युपेशनल हेल्थ व कम्युनिटी मेडिकल सेंटर, जामनगर यांच्या सहकार्याने देशातील पहिला टेली-रोबोटिक सर्जरी कार्यक्रम सुरू केल्याची घोषणा केली आहे. रिलायन्स जिओच्या अत्याधुनिक व हाय-स्पीड डिजिटल कनेक्टिव्हिटीवर आधारित हा उपक्रम भारतातील दूरस्थ शस्त्रक्रिया सेवांसाठी महत्त्वाचा टप्पा मानला जात आहे. या कार्यक्रमाअंतर्गत ‘एचएनआरएफएच’मधील अनुभवी तज्ज्ञ शल्यचिकित्सक मुंबईहूनच देशभरातील सहकार्यात्मक रुग्णालयांमध्ये रोबोटिक-सहाय्यित शस्त्रक्रियांचे दूरस्थ मार्गदर्शन व संचालन करणार आहेत. त्यामुळे जटिल आणि उच्च अचूकतेच्या शस्त्रक्रिया आता केवळ महानगरांपुरत्या मर्यादित न राहता जामनगरसह दूरस्थ व बिगर-महानगरीय भागांतील रुग्णांपर्यंत थेट पोहोचणार आहेत. तंत्रज्ञानाच्या माध्यमातून प्रगत आरोग्यसेवांचा विस्तार घडवून आणणारा हा उपक्रम रुग्णांना त्यांच्या स्वतःच्या शहरात सुरक्षित, वेळेवर आणि जागतिक दर्जाचे उपचार मिळवून देण्यात मोलाची भूमिका बजावणार आहे.