तालुक्‍यातील रेशनिंगच्या गैरव्‍यवहाराबाबत तहसीलदारांना निवेदन

तालुक्‍यातील रेशनिंगच्या गैरव्‍यवहाराबाबत तहसीलदारांना निवेदन
पोलादपूर, ता. २७ (बातमीदार) : तालुक्यातील काही रेशनिंग दुकानदारांकडून सुरू असलेल्या कथित गैरव्यवहारांबाबत आपली माती आपली माणसं सामाजिक संस्थेच्या वतीने नुकतेच पोलादपूर तहसीलदार कपिल घोरपडे यांना लेखी निवेदन सादर करण्यात आले आहे. याप्रकरणी तातडीने कारवाई न झाल्यास १२ जानेवारी रोजी तहसील कार्यालयाबाहेर उपोषण करण्यात येईल, असा इशारा देण्यात आला आहे.
रेशन हे नागरिकांचे मूलभूत हक्क असून शासनाच्या नियमानुसार प्रत्येक लाभार्थ्याला संपूर्ण व वेळेवर धान्य मिळणे आवश्यक आहे. मात्र काही रेशन दुकानदारांकडून नियमांचे उल्लंघन करून धान्य कमी देणे, अनियमित वितरण करणे तसेच लाभार्थ्यांची फसवणूक केल्याच्या तक्रारी सातत्याने समोर येत आहेत. या तक्रारींकडे दुर्लक्ष झाल्यास सामान्य नागरिकांचा प्रशासनावरचा विश्वास डळमळीत होण्याची शक्यता नाकारता येत नसल्याचे संस्थेने स्पष्ट केले आहे. आपली माती आपली माणसं सामाजिक संस्थेचे संस्थापक राज पार्टे यांनी सांगितले की, जर यापुढेही संबंधित रेशन दुकानदारांवर कडक कारवाई करण्यात आली नाही, तर आंदोलन तीव्र करण्यात येईल, असा इशाराही देण्यात आला आहे.