रस्ते खोदकाम करणाऱ्या ठेकेदाराविरोधात गुन्हा

भिवंडी (बातमीदार) : सर्वोच्च न्यायालयाच्या निर्देशांचा तसेच नियमांचा भंग करून मध्यरात्री सार्वजनिक रस्त्यावर खोदकाम करून नागरिकांची शांतता भंग केल्याचा प्रकार भिवंडी शहरात उघडकीस आला आहे. याप्रकरणी भिवंडी शहर पोलिसांनी महापालिकेच्या ठेकेदाराविरोधात गुन्हा दाखल केला आहे.
शहरात अनेक ठिकाणी रात्रीच्या वेळी रस्त्यांची कामे अथवा अनधिकृत बांधकामे सुरू असल्याच्या तक्रारी वारंवार नागरिकांकडून केल्या जात आहेत. पोलिसांच्या माहितीनुसार, शहर पोलिस ठाण्यात तक्रारदार पोलिस कॉन्स्टेबल विशाल कामतकर (वय ३२) यांनी तक्रारीत नमूद केले की, २६ डिसेंबरला रात्री साडेबारा ते दीड या वेळेत फुलेनगर परिसरातील बुद्धविहार येथील सार्वजनिक रस्त्यावर महापालिकेचे ठेकेदार ‘पियारा कन्स्ट्रक्शन’ यांच्यामार्फत रस्त्याचे खोदकाम व डांबरीकरण सुरू होते. या कामासाठी वाहतूक पोलिसांची कोणतीही परवानगी घेतलेली नव्हती. जड यंत्रसामग्रीच्या वापरामुळे मोठा आवाज आणि गोंधळामुळे शांततेचा भंग झाला. रात्रीच्या वेळी परवानगीशिवाय हे काम सुरू होते. याप्रकरणी शहर पोलिस ठाण्यात गुन्हा दाखल केला आहे.