हॉर्न वाजवल्याने दुचाकीस्वारावर जीवघेणा हल्ला

हॉर्न वाजवल्याने दुचाकीस्वारावर जीवघेणा हल्ला

भिवंडी, ता. २९ (वार्ताहर) : दुचाकीस्वाराने पुढे जाण्यासाठी कारला हॉर्न दिल्याने या कारमधील तिघांनी या दुचाकीस्वारावर लोखंडी रॉडने जीवघेणा हल्ला केल्याची घटना घडली. या हल्ल्यात दुचाकीस्वार गंभीर जखमी झाला असून, याप्रकरणी नारपोली पोलिस ठाण्यात आरोपी तिघांच्याविरोधात गुन्हा दाखल करण्यात आला असून, दोघांना अटक करण्यात आली आहे. अभिषेक उर्फ अभ्या संभाजी देशमुख (वय २६), शिवम गुडडु शर्मा (२२) अशी अटक आरोपींची नावे आहेत, तर निखिल तुकाराम खरात (२५) असे हल्ल्यात जखमी झालेल्या तरुणाचे नाव आहे. पोलिसांनी दिलेल्या माहितीनुसार रविवारी (ता. २८) कामतघर येथील ब्रम्हानंद नगर येथे आरोपींची कार उभी होती. त्या वेळी या कारच्या पुढे जाण्यासाठी दुचाकीस्वार निखिलने हॉर्न वाजवला. याचाच राग मनात धरून तिघांनी निखिलला शिवीगाळ करत मारहाण केली. याप्रकरणी निखिलच्या तक्रारीवरून नारपोली पोलिस ठाण्यात विविध कलमान्वये गुन्हा दाखल केला असून, दोघांना अटक केली असून, त्यांना न्यायालयात हजर केले असता न्यायालयाने आरोपींना कोठडी सुनावली आहे.