नवी मुंबईत सोमवारी १४८ अर्ज दाखल

वाशी, ता. ३० (बातमीदार) : नवी मुंबई महापालिकेच्या निवडणुकीसाठी उमेदवार नामनिर्देशन अर्ज दाखल करण्याच्या प्रक्रियेला वेग येऊ लागला आहे. सोमवारी (ता. २९) शहरातील विविध प्रभागांमधून एकूण १४८ उमेदवारांनी अर्ज दाखल केल्याची माहिती पालिका निवडणूक प्रशासनाकडून देण्यात आली आहे.
प्रभागनिहाय आकडेवारीनुसार, कोपरखैरणे विभागातून सर्वाधिक ३६ नामनिर्देशन अर्ज दाखल झाले आहेत. त्यापाठोपाठ तुर्भे विभागातून २६, नेरूळ २२, दिघा १८, वाशी १४, घणसोली १०, तर बेलापूर व ऐरोली विभागातून प्रत्येकी आठ अर्ज दाखल झाले आहेत. या आकडेवारीवरून सर्वच प्रभागांमध्ये निवडणूक रणधुमाळीला सुरुवात झाल्याचे स्पष्ट होत आहे. सोमवारी उमेदवारांकडून नामनिर्देशन अर्जांच्या वितरणालाही मोठा प्रतिसाद मिळाला असून एकाच दिवशी २५९ नामनिर्देशन अर्जांचे वितरण करण्यात आले आहे. आतापर्यंत एकूण दोन हजार ७४९ अर्जाचे वितरण करण्यात आले आहे. अंतिम टप्प्यात अर्ज दाखल करण्यासाठी इच्छुक उमेदवारांची गर्दी वाढत असल्याचे चित्र विविध प्रभाग कार्यालयांमध्ये दिसून आले.