विद्यार्थी हे उद्याचे भविष्य आहेत : रजनीकांत श्रॉफ

विद्यार्थी हेच देशाचे उद्याचे भविष्य
रजनीकांत श्रॉफ यांचे प्रतिपादन
वाणगाव, ता.३० (बातमीदार) : "विद्यार्थी हे उद्याचे भविष्य असून त्यांनी डायरी लेखन आणि अंतर्गत कौशल्य विकासावर भर दिला पाहिजे," असे प्रतिपादन चिंचणी तारापूर शिक्षण संस्थेचे अध्यक्ष रजनीकांत श्रॉफ यांनी केले. चिंचणी येथील एम. के. ज्युनियर कॉलेजच्या ५१ व्या वार्षिक पारितोषिक वितरण समारंभात ते बोलत होते.
प्रमुख अतिथी म्हणून उपस्थित असलेले डहाणूचे साहाय्यक प्रकल्प अधिकारी डॉ. बन्सीलाल पाटील यांनी स्वामी विवेकानंदांच्या विचारांचा आदर्श समोर ठेवण्याचे आवाहन केले. "संधीचे सोने करण्यासाठी आत्मविश्वास, कठोर परिश्रम आणि चिकाटीची गरज आहे. युवकांनी सृजनशील बनून ध्येय निश्चित करावे," असे मार्गदर्शन त्यांनी केले. तर प्रभारी प्राचार्या डॉ. सुचिता करवीर यांनी अपयशाने खचून न जाता वेळेचे नियोजन करून यश मिळेपर्यंत प्रयत्नशील राहण्याचा सल्ला दिला.
सोहळ्यात मान्यवरांच्या हस्ते महाविद्यालयाच्या २७ व्या ''सागर मोती'' या वार्षिक नियतकालिकाचे विमोचन करण्यात आले. वर्षभरात शैक्षणिक आणि अवांतर क्षेत्रात उल्लेखनीय कामगिरी करणाऱ्या गुणवंत विद्यार्थ्यांचा यावेळी पारितोषिक देऊन गौरव करण्यात आला. या प्रसंगी संस्थेच्या कार्यकारिणी सदस्या डॉ. रमिलाबेन श्रॉफ, महेश पाटील, माजी उपप्राचार्य जनार्दन शिंदे, प्राचार्य सुनील बैसाणे, उपप्राचार्या संगीता चुरी, पर्यवेक्षक प्रा. सूरज आष्टेकर, प्रा. दिनकर टेकनर यांच्यासह शिक्षक, कर्मचारी, विद्यार्थी आणि पालक मोठ्या संख्येने उपस्थित होते.