निचोळे ग्रामस्थांनी राबविले स्वच्छता अभियान

लोकसहभागातून निचोळे गावात स्वच्छता अभियान
वाडा, ता. ३० (बातमीदार) : तालुक्यातील निचोळे ग्रामपंचायतीने ''मुख्यमंत्री समृद्ध पंचायत राज अभियान'' अंतर्गत राबवलेल्या स्वच्छता मोहिमेला ग्रामस्थांनी उत्स्फूर्त प्रतिसाद दिला. तब्बल दोन तास श्रमदान करून ग्रामस्थांनी संपूर्ण गाव चकाचक केले असून, या उपक्रमातून स्वच्छतेचा एक नवा आदर्श निर्माण केला आहे.
ग्रामपंचायतीच्या वतीने आयोजित या स्वच्छता मोहिमेत अबालवृद्धांनी सहभाग घेतला. सकाळी दोन तासांहून अधिक काळ चाललेल्या या मोहिमेत गावांतील प्रत्येक गल्ली आणि सार्वजनिक ठिकाणांची साफसफाई करण्यात आली. विशेष म्हणजे, गावातील प्लास्टिक कचरा संकलित करून तो पुनर्प्रक्रियेसाठी ग्रामपंचायतीकडे सुपूर्द करण्यात आला, ज्यामुळे गावाला प्लास्टिकमुक्त करण्याच्या दिशेने एक मोठे पाऊल पडले आहे. या अभियानामध्ये ग्रामपंचायतीच्या सरपंच सुचिता पष्टे, उपसरपंच भाई पष्टे यांच्यासह प्रशासकीय अधिकारी आणि कर्मचाऱ्यांनी प्रत्यक्ष रस्त्यावर उतरून साफसफाई केली. ग्रामपंचायत अधिकारी प्रतीक्षा तांबडे, ऋतुजा पाटील, शरद पवार, शशिकांत पारधी, अश्विनी पवार तसेच केंद्रपरी चालक, पेसा मोबिलाइझर आणि सीआरपी बचत गटाच्या महिलांनी या मोहिमेत मोलाचे योगदान दिले.