ग्रामपंचायत क्षेत्रातील निवासी सदनिकाधारक मालमत्ता कराच्या सवलतीपासून वंचित

मानमधील निवासी सदनिकाधारक मालमत्ता कर सवलतीपासून वंचित
तारापूर, ता. ३१ (बातमीदार) : मुख्यमंत्री समृद्ध पंचायत राज अभियानांतर्गत निवासी मालमत्ता करात ५० टक्के सवलत देण्याबाबत शासनाने निर्णय घेतला असला, तरी पालघरमधील बेटेगाव आणि मान ग्रामपंचायतींनी ही योजना लागू न केल्याने रहिवाशांमध्ये नाराजी आहे.
बोईसर, सरावली व खैरापाडा या शेजारील ग्रामपंचायतींनी विशेष सभा घेऊन सवलत लागू केली आहे. मात्र, बेटेगाव आणि मान हद्दीतील टाटा हाऊसिंग, महिंद्रा हॅप्पीनेस्ट यांसारख्या मोठ्या संकुलांमधील सुमारे १५ ते २० हजार सदनिकाधारकांना या सवलतीचा लाभ मिळालेला नाही. मालमत्ता कराची मोठी थकबाकी असल्याने, ५० टक्के सवलत दिली असती तर वसुली होऊन ग्रामपंचायतीच्या उत्पन्नात वाढ झाली असती आणि सामान्यांनाही दिलासा मिळाला असता. मात्र, प्रशासनाच्या निरुत्साहामुळे नागरिक या लाभापासून वंचित राहिले असल्याचे बोलले जात आहे.
-----------------
मुख्यमंत्री समृद्ध पंचायत राज अभियान अंतर्गत मालमत्ता धारकाना मालमत्ता करांमध्ये ५० टक्के सूट देण्याबाबत शासन निर्णय हा ग्रामपंचायतींसाठी ऐच्छिक आहे. तरीही जास्तीत जास्त ग्रामपंचायतीनी याबाबत विशेष ग्रामसभा घेऊन त्यामध्ये नागरिकांना सवलत देण्याबाबत चर्चा करीत आहोत.
- मनोज रानडे, मुख्य कार्यकारी अधिकारी, जिल्हा परिषद पालघर