विद्या विकास, विक्रोळी येथील डॉ. बाबासाहेब आंबेडकर विद्यालयाच्या मुलींच्या कबड्डी संघाची दैदिप्यमान कामगिरी

डॉ. बाबासाहेब आंबेडकर विद्यालयाच्या मुलींच्या कबड्डी संघाची देदीप्यमान कामगिरी
घाटकोपर, ता. ३ (बातमीदार) :
विद्या विकास एज्युकेशन सोसायटी, विक्रोळी अंतर्गत कार्यरत डॉ. बाबासाहेब आंबेडकर विद्यालयाच्या मुलींच्या कबड्डी संघाने विविध आंतरशालेय स्पर्धांमध्ये देदीप्यमान यश संपादन करीत शाळेचे नाव उज्ज्वल केले आहे. विविध वयोगटांतील संघांनी उत्कृष्ट खेळाचे प्रदर्शन करीत विजयाची पताका फडकावली असून, या यशामुळे संपूर्ण शैक्षणिक परिसरात आनंदाचे वातावरण निर्माण झाले आहे.
शाळेचे क्रीडा शिक्षक तसेच विकास स्पोर्टस् अकॅडमीचे कबड्डी प्रशिक्षक महेंद्र जंगम यांच्या कुशल मार्गदर्शनाखाली विद्यार्थिनींनी श्री उद्यान गणेश मंदिर सेवा समिती, महात्मा गांधी विद्यालय (बांद्रा), मुंबई स्कूल स्पोर्टस् असोसिएशन, मॉडर्न एज्युकेशन (छेडानगर, चेंबूर) तसेच भरारी क्रीडा महोत्सव, चेंबूर येथे झालेल्या प्रतिष्ठित आंतरशालेय स्पर्धांमध्ये सहभाग नोंदवला.
या स्पर्धांमध्ये १४ वर्षांखालील, १६ वर्षांखालील आणि १७ वर्षांखालील गटातील मुलींच्या संघांनी अंतिम फेरीत दमदार खेळ करीत विजेतेपद पटकावले. याशिवाय मुंबई शहराच्या किशोरी व कुमारी कबड्डी संघासाठी पायल सुधाकर कांचन, ईशा ज्ञानदेव डिगे, तन्वी श्रीधर काणेकर, दृष्टी नीलेश कुंभार आणि तनुजा गजानन चाटे या खेळाडूंची निवड झाली आहे.
या खेळाडूंनी महाराष्ट्र राज्य किशोरी व कुमारी अजिंक्यपद कबड्डी चाचणीत मुंबई शहर संघाचे प्रतिनिधित्व करीत उत्कृष्ट कामगिरी बजावली असून, शाळेच्या शिरपेचात मानाचा तुरा खोवला आहे.
या देदीप्यमान यशाबद्दल सर्व स्तरांतून अभिनंदनाचा वर्षाव होत असून, शाळेचे सचिव डॉ. विनय राऊत, विश्वस्त मंडळ, पदाधिकारी, मुख्याध्यापक तसेच शिक्षकवर्ग यांनी यशस्वी खेळाडूंचे अभिनंदन करीत त्यांच्या पुढील क्रीडा वाटचालीसाठी शुभेच्छा दिल्या आहेत.