भाजपाच्या तीन महिला उमेदवारांची नगरसेवकपदी बिनविरोध निवड

तीन महिला उमेदवारांची बिनविरोध निवड
मतदानापूर्वीच कल्याण-डोंबिवलीत भाजपचे कमळ फुलले
कल्याण, ता. ३१ (वार्ताहर) : कल्याण-डोंबिवली महापालिका निवडणुकीत भारतीय जनता पक्षाला दिलासा मिळाला आहे. कल्याण पूर्वेतील प्रभाग क्रमांक १८-अ (ओबीसी महिला राखीव जागा)मधून भाजपच्या रेखा राजन चौधरी यांचा एकमेव उमेदवारी अर्ज दाखल झाला आहे. तसेच डोंबिवलीतील प्रभाग क्रमांक २६-क मधून आसावरी केदार नवरे यांचाही एकमेव अर्ज दाखल झाल्याने त्या बिनविरोध निवडून आल्या आहेत. तसेच रंजना पेडणेकर या डोंबिवलीतील प्रभाग क्रमांक २६ ब मधून बिनविरोध निवडून आल्या आहेत. या विजयाची माहिती भाजपचे प्रदेशाध्यक्ष रवींद्र चव्हाण यांनी दिली आहे.
३१ प्रभागांतील एकूण १२२ जागांसाठी मंगळवारी उमेदवारी अर्ज दाखल करण्याची अंतिम मुदत होती. या कालावधीत प्रमुख राजकीय पक्षांसह अपक्ष उमेदवारांनी मोठ्या संख्येने अर्ज दाखल केले. मात्र कल्याण पूर्वेतील प्रभाग क्रमांक १८-अ (नागरिकांचा मागास प्रवर्ग- महिला राखीव)साठी भाजपच्या महिला जिल्हाध्यक्ष रेखा राजन चौधरी यांचा एकमेव अर्ज आला. त्यामुळे या जागेवर त्यांची बिनविरोध निवड निश्चित झाली आहे. तसेच डोंबिवली पूर्वेतील प्रभाग क्रमांक २६-क (ज्यामध्ये राजाजी पथ, शिव मार्केट, रामनगर, सावरकर रोड)मधून भाजपच्या आसावरी केदार नवरे यांचाही एकमेव अर्ज दाखल झाल्याने त्यांचीही बिनविरोध निवड झाली आहे. तसेच भाजपच्या रंजना पेडणेकर या डोंबिवलीतील प्रभाग क्रमांक २६ ब मधून बिनविरोध निवडून आल्या आहेत. या तिन्ही बिनविरोध विजयांमुळे भाजपने निवडणुकीपूर्वीच आपले खाते उघडले आहे. तीन महिला उमेदवारांच्या बिनविरोध निवडीमुळे पक्ष कार्यकर्त्यांमध्ये जल्लोषाचे वातावरण आहे.
------
ःअोळ फोटो
रेखा राजन चौधरी, आसावरी केदार नवरे
------