भारताची लोकधारा ज्युनिअर कॉलेजचा रंगतदार कला-क्रीडा महोत्सव

''भारताची लोकधारा'' कला-क्रीडा महोत्सव उत्साहात
वाणगाव, ता. ३१ (बातमीदार) : चिंचणी येथील एम. के. ज्युनिअर कॉलेजचा वार्षिक कला-क्रीडा महोत्सव नुकताच विविध उपक्रमांनी संपन्न झाला. ''भारताची लोकधारा'' या मुख्य संकल्पनेवर आधारित सांस्कृतिक कार्यक्रमातून विद्यार्थ्यांनी भारताच्या विविध प्रांतांतील लोककलांचे दर्शन घडवले.
पोवाडा, जागर, लावणी, कोळीगीत, तारपा नृत्य तसेच बंगाली, हरियाणवी, भोजपुरी आणि तमिळ नृत्यांच्या सादरीकरणातून देशाची विविधता जपली गेली. चिंचणी पोलिस ठाण्याचे पोलिस उपनिरीक्षक शिवकुमार नंदगावे यांनी विद्यार्थ्यांना सायबर गुन्हे, व्यसनमुक्ती आणि स्पर्धा परीक्षांच्या महत्त्वाबाबत मार्गदर्शन केले. मैदानी स्पर्धांसह क्रिकेट, खो-खो, सूर्यनमस्कार आणि बुद्धिबळ अशा विविध खेळांचे आयोजन स्पोर्ट्स डायरेक्टर सुधीर भांडवलकर यांच्या नियोजनाखाली करण्यात आले होते. चिंचणी तारापूर एज्युकेशन सोसायटीचे अध्यक्ष रजनीकांत श्रॉफ, प्राचार्य सुनील बैसाणे, उपप्राचार्य संगीता चुरी आणि मान्यवरांच्या उपस्थितीत विजेत्यांना पारितोषिके देऊन गौरविण्यात आले.