कळव्यात शिवसैनिकांत नाराजी!

तिकीट कापल्याने राजीनामा देण्याचा इशारा
कळवा, ता. १(बातमीदार) ः माजी उपमहापौर राजेंद्र साप्ते यांना शिवसेनेने तिकीट नाकारल्याने कळव्यातील शिवसैनिक नाराज झाले आहेत. त्यांनी स्वर्गीय आनंद दिघे यांच्या शक्तीस्थळी नतमस्तक होऊन आपल्या सदस्याचा राजीनामा देण्याचा इशारा दिला आहे.
राजेंद्र साप्ते हे कळव्यातून दोन वेळा व कळवा पूर्व डोंगर पट्ट्यातून एकदा नगरसेवक म्हणून निवडून आले आहेत. त्यांनी उपमहापौर पदावर काम केले आहे. स्थायी समिती व इतर समित्यांवर काम केले आहे. तर, मागील निवडणुकीत स्वीकृत सदस्य म्हणून ते कार्यरत होते. यंदा निवडणुकीत महायुतीत प्रभाग क्रमांक २५ भाजपला सोडल्याने तेथून दीनानाथ पांडे यांना भाजपमधून तिकीट देण्यात आले आहे. राजेंद्र साप्ते यांचा तिकीट कापल्याने त्यांचे समर्थक शिवसैनिक नाराज झाले आहे.