प्रवासी महिलेचे १३ लाखांचे दागिने लंपास

नवी मुंबई (वार्ताहर) : मंगलोर येथून खासगी बसमधून प्रवास करणाऱ्या एका महिलेचे १३ लाखांचे दागिने चोरट्याने प्रवासादरम्यान चोरल्याची घटना उघडकीस आली आहे. सीबीडी पोलिसांनी या प्रकरणातील गुन्हा दाखल केला आहे. शोभा कॅस्टेलिनो (वय ४५) या मिरा रोड येथे राहण्यास असून त्या खासगी रुग्णालयामध्ये परिचारिकेचे काम करतात. दोन आठवड्यांपूर्वी त्या कर्नाटकातील मंगलोर येथे कुटुंबासह गेल्या होत्या. त्यानंतर २१ डिसेंबरला खासगी कंपनीच्या बसने मुंबईला परतत होत्या. त्यांच्यासोबत त्यांची मोठी बहीण व दोन मुली होत्या. या प्रवासादरम्यान शोभा व इतर झोपले असताना, चोरट्याने त्यांच्या पर्समधून सोन्याचे व डायमंडचे दागिने व रोख रक्कम असा तब्बल १२ लाख ९९ हजार रुपयांचा ऐवज चोरला. ही बस सीबीडी बेलापूरजवळ आली असताना शोभा यांनी पर्स तपासली असता, सर्व दागिने व रोख रक्कम चोरीला गेल्याचे त्यांच्या लक्षात आले. त्यानंतर त्यांनी मिरा रोड येथे जाऊन नयानगर पोलिस ठाण्यात तक्रार दाखल केली. पोलिसांनी हा गुन्हा पुढील तपासासाठी सीबीडी पोलिसांकडे वर्ग केला आहे.