ठाण्यात पोलिस उपायुक्ताला धक्काबुक्की

ठाण्यात पोलिस उपायुक्ताला धक्काबुक्की
ठाणे : शहर पोलिस मुख्यालय १चे उपायुक्त डॉ. श्रीकांत परोपकारी यांना धक्काबुक्की करण्यात आल्याचा प्रकार समोर आला आहे. याप्रकरणी परोपकारी राहत असलेल्या सोसायटीतील गौतम चैतन्यचरण नंदी (वय ५५) याच्या विरोधात कासारवडवली पोलिस ठाण्यात गुन्हा दाखल झाला आहे. ही घटना बुधवारी (ता. ३१) घडली.
पोलिस शिपाई रामकृष्ण बैलमारे (वय ३६) यांनी दिलेल्या तक्रारीत ते बुधवारी (ता. ३१) सकाळी गाडी घेऊन पोलिस उपायुक्त राहत असलेल्या सोसायटीत परोपकारी यांना आणण्यासाठी गेलो होते. त्या वेळी नंदी याने गाडीसमोर उभे राहून जोरजोरात शिवीगाळ करीत सोसायटीचा दरवाजा बंद केला. तसेच पोलिस उपायुक्त परोपकारी हे गेट उघडण्यासाठी गेले असता त्यांना धक्काबुक्की केल्याचे तक्रारीत नमूद करण्यात आले आहे. याप्रकरणी कासारवडवली पोलिस ठाण्यात गुन्हा दाखल झाला आहे. पुढील तपास वरिष्ठ पोलिस निरीक्षक निवृत्ती कोल्हटकर यांच्या मार्गदर्शनाखाली सुरू आहे.