भिवंडीत आचारसंहिता पथकाकडून ४ लाख ४० हजारांची रक्कम जप्त

भिवंडीत चार लाख ४० हजारांची रक्कम जप्त
भिवंडी, ता. २ (वार्ताहर) ः शहरातील आचारसंहिता भरारी पथकाने साईबाबा तपासणी नाका परिसरात गुरुवारी (ता. १) सायंकाळी एका वाहनातून चार लाख ४० हजार रुपयांची रोख रक्कम जप्त केली आहे. आचारसंहिता पथकप्रमुख तथा अतिरिक्त आयुक्त विठ्ठल डाके तसेच सहाय्यक पथकप्रमुख समीर जवरे यांच्या नियंत्रणाखाली भरारी पथक क्रमांक १चे अधिकारी दीपक हनुमान नाईक आणि त्यांच्या सहकाऱ्यांनी ही कारवाई केली.
साईबाबा नाका येथे तपासणीदरम्यान चारचाकी वाहनाची तपासणी करताना वाहनात चार लाख ४० हजारांची रोख रक्कम आढळली. वाहनचालक नरेंद्रसिंग मधुकर देवरे यांच्याकडे ही रक्कम कुठून आली, कुठे चालवली आणि काय कामासाठी घेतली, याबाबतची कागदपत्रांची मागणी केली. मात्र वाहनचालकाने कोणत्याही प्रकारची कागदपत्रे भरारी पथकाच्या निदर्शनास येऊ दिली नाहीत. त्यामुळे पथकाने मोजणी आणि पंचनामा करून चार लाख ४० हजार रुपये पकडल्याबाबत शांतीनगर पोलिस ठाण्यात नोंद करून ती रक्कम मनपाच्या लेखा विभागात जमा करण्यात आली.