महायुतीचे ११ उमेदवार बिनविरोध...

महायुतीचे ११ उमेदवार बिनविरोध
कल्याण-डोंबिवलीत भाजपचे पारडे जड

सकाळ वृत्तसेवा
डोंबिवली, ता. २ ः कल्याण-डोंबिवली महापालिका निवडणुकीत उमेदवारी अर्ज माघार घेण्याचा शुक्रवार (ता. २) शेवटचा दिवस होता. महायुतीचे ११ उमेदवार हे बिनविरोध निवडून आले आहेत. यामध्ये भाजपचे नऊ तर शिवसेना शिंदे गटाच्या दोन उमेदवारांचा समावेश आहे.
कल्याण-डोंबिवली महापालिकेची यंदा प्रथमच पॅनेल पद्धतीने निवडणूक होत आहे. येथे एक पॅनेल हा बिनविरोध निवडून आला आहे. तर पॅनेल २६ आणि १९ मधून तीन उमेदवार हे बिनविरोध निवडून आले आहेत. शुक्रवारी भाजपचे नऊ तर शिवसेना शिंदे गटाचे दोन उमेदवार हे बिनविरोध निवडून आले. भाजपचे महेश पाटील यांच्याविरोधात मनसेचे मनोज घरत यांनी उमेदवारी मागे घेतली.
पॅनेल १९ मध्ये महेश पाटील यांच्या भगिनी डॉ. सुनीता पाटील यांच्याविरोधात मनसेच्या काजल पाटील यांनी माघार घेतली आहे. तर साई शेलार व पूजा पाटील म्हात्रे यांच्याविरोधात ठाकरे गटाचे कुंदन काळण व शीतल ठोसर यांनी माघार घेतली आहे.

एका जागेसाठी निवडणूक
पॅनेल १९ मध्ये आता केवळ एकाच जागेसाठी निवडणूक शिल्लक राहिली असून भाजपचे विनोद काळण आणि शिंदे सेनेतून मनसेत गेलेले जयंता पाटील यांच्यात थेट लढत होणार आहे. त्यामुळे संपूर्ण पॅनेल भाजपच्या पारड्यात टाकण्याचा डाव यशस्वी ठरतो की या एका जागेतून विरोधक भाजपला आव्हान देतात, याकडे आता लक्ष लागले आहे.
--------
कल्याणमध्ये एकच खाते
कल्याणमध्ये शिवसेना शिंदे गटाने एकच खाते उघडले असून पॅनेल ११ अ मधून रेश्मा निचळ यांची बिनविरोध निवड झाली आहे. ठाकरे गटाच्या सुशीला माळी यांनी येथे माघार घेतली आहे. तर पॅनेल २८ ब मधून ज्योती मराठे यांची बिनविरोध निवड झाली आहे.
---------------------------
बिनविरोध उमेदवार
भाजप ः महेश पाटील, दीपेश म्हात्रे, जयेश म्हात्रे, मुकुंद पेडणेकर, साई शेलार, डॉ. सुनीता पाटील, पूजा म्हात्रे, रवीना माळी, हर्षदा भोईर
----------
शिवसेना शिंदे गट ः ज्योती मराठे, रेश्मा निचळ
-------------------
आतापर्यंत कल्याण-डोंबिवलीत भाजपचे १४ तर शिवसेना शिंदे गटाचे सहा असे महायुतीचे एकूण २० उमेदवार हे बिनविरोध निवडून आले आहेत.