मुंबईचा महापौर राष्ट्रवादीचाच !

मुंबईचा महापौर राष्ट्रवादीचाच !
नवाब मलिक यांचा दावा

सकाळ वृत्तसेवा
 मुंबई, ता. २ : ‘मुंबईच्या महापौर पदावरून वाद सुरू आहे. कोण म्हणते मराठी महापौर, कोण म्हणते उत्तर भारतीय महापौर; पण मुंबईचा महापौर राष्ट्रवादीचाच,’ असा ठाम दावा राष्ट्रवादी काँग्रेस (अजित पवार) पक्षाचे नेते आणि माजी मंत्री नवाब मलिक यांनी केला. मुंबई महापालिका निवडणुकीच्या पार्श्वभूमीवर मलिक पत्रकार परिषदेत बोलत होते.
मुंबई महापालिकेच्या निवडणुकीचा निकाल १६ जानेवारीला जाहीर होणार असून, त्या दिवशी राष्ट्रवादीची ताकद कळेल. राज्यातील २९ महापालिकांच्या निवडणुकीत कोणीही युती धर्म पाळला नाही, असा टोला नवाब मलिक यांनी भाजपचे नाव न घेता लगावला. महाराष्ट्रात स्थानिक स्वराज्य संस्थांच्या निवडणुकांमध्ये तसेच अन्य निवडणुकांमध्ये स्थानिक आघाड्या केल्या जातात. या वेळी कोणता पक्ष कोणासोबत युती किंवा आघाडी करून निवडणूक लढवेल हे सांगणे कठीण असते. त्यामुळे राज्यात सत्तेत असलेले किंवा विरोधात असलेल्यांपैकी कोणीही युती धर्म पाळला नाही, असे त्यांनी स्पष्ट करीत भाजपवर टीका केली. मुंबई महापालिका निवडणुकीत युतीमध्ये नवाब मलिक असतील तर राष्ट्रवादी काँग्रेससोबत युती करणार नाही, अशी भूमिका भाजपने घेतली होती. त्यामुळे राष्ट्रवादी काँग्रेसने स्वबळावर लढण्याची भूमिका घेतली आणि आम्ही स्वबळावर लढत आहोत. त्यामुळे पक्षाचे नेते अजित पवार यांचे आपण आभारी आहोत, की त्यांनी ठाम भूमिका घेतली, असे नवाब मलिक म्हणाले. निवडणूक प्रक्रिया सुरू झाल्यानंतर निवडणूक निर्णय अधिकारी काटेकोरपणे अंमलबजावणी करणे हे त्यांचे कर्तव्य असताना तिकडे दुर्लक्ष करीत असल्याचे मलिक म्हणाले.
...
कायद्याचे उल्लंघन!
मलिक म्हणाले, की एक उमेदवार उच्च न्यायालयात गेला आहे. एका उमेदवाराच्या बाबतीत निवडणूक निर्णय अधिकारी रात्री साडेदहा वाजता निर्णय घेतात. उमेदवाराने बेकायदा बांधकाम केले आहे त्याचे पुरावे सादर केले आहेत, तरीही त्याचा अर्ज बाद करीत नाहीत. इथे कायद्याचे उल्लंघन करण्यात आलेले आहे.