छायाचित्रांवरून काँग्रेसला तंबी

छायाचित्रांवरून काँग्रेसला तंबी
उद्धव, राज ठाकरेंच्या प्रतिमा वापरण्याला विरोध
भाईंदर, ता. ३ (बातमीदार) : शिवसेनेचे पक्षप्रमुख उद्धव ठाकरे, मनसेप्रमुख राज ठाकरे यांची छायाचित्रे काँग्रेसने प्रचारादरम्यान वापरू नयेत, असा इशारा मिरा-भाईंदर शिवसेना ठाकरे गट, मनसेच्या नेत्यांनी दिला आहे. तसेच या प्रकरणात निवडणूक आयोगाकडेही तक्रारीचा इशारा दिला आहे.
मिरा-भाईंदर महापालिकेच्या निवडणुकीसाठी महाविकास आघाडीत फूट पडली आहे. निवडणुकीसाठी शिवसेना ठाकरे गट, मनसे एकत्र आले आहेत. ठाकरे गट ५६ जागांवर तर मनसे ११ जागांवर निवडणूक लढवत आहे. काँग्रेसची ताकद असलेल्या जागा सोडण्यास तयारी होती; मात्र ठाकरे गटाची ताकद असलेल्या जागा काँग्रेसला हव्या होत्या. त्यामुळे मविआतून बाहेर पडण्याचा निर्णय घेण्यात आला. अशातच काँग्रेसने अधिकृत उमेदवारांची यादी शुक्रवारी प्रसिद्ध केली. त्यात शिवसेना उद्धव बाळासाहेब ठाकरे पक्ष, महाराष्ट्र निवनिर्माण सेना व राष्ट्रवादी शरद पवार पक्षांशी झालेल्या चर्चेनुसार काँग्रेसने अधिकृत उमेदवार दिले आहेत; मात्र ठाकरे गटाने यावर आक्षेप घेतला आहे. तसेच काँग्रेसने आपल्या मर्जीनुसार निर्णय घेत असल्याने स्वबळावर निवडणूक लढवणार असल्याचे ठाकरे गटाचे नेते मनोज मयेकर, मनसेचे शहर अध्यक्ष संदीप राणे यांनी सांगितले.