वाशीमध्ये गुटख्याचा मोठा साठा जप्त

नवी मुंबई, ता. ३ (वार्ताहर) : प्रतिबंधित गुटख्याची अवैध वाहतूक व विक्री करणाऱ्या त्रिकुटावर वाशी पोलिसांनी कारवाई करत पाच लाख ११ हजारांचा गुटख्याचा साठा, तसेच १३ लाखांची दोन वाहने जप्त केली आहेत. या कारवाईत पोलिसांनी तिघा संशयितांना अटक केली आहे. ही कारवाई शुक्रवारी (ता. २) वाशीतील इनऑर्बिट मॉलच्या मागील बाजूस असलेल्या पार्किंग परिसरात करण्यात आली.

मोहम्मद कलीम मदारसाहब (वय ४४, रा. गुलबर्गा, कर्नाटक), सागर भरत पवार (वय ३८, रा. सेक्टर १५, कोपरखैरणे) आणि योगेश भारत गणतरा (वय ४२, रा. मुलुंड पूर्व) यांनी शुक्रवारी सकाळी हैदराबाद (तेलंगण) येथून महाराष्ट्रात विक्रीसाठी पानमसाला, गुटखा टेम्पोतून आणला होता. त्यानंतर हा टेम्पो वाशीतील इनऑर्बिट मॉलच्या मागील बाजूस पार्किंग आवारात उभा केला होता. टेम्पोतील गुटख्याचा साठा मुंबईत विक्रीसाठी लहान टेम्पोमध्ये भरण्याची तयारी सुरू केली होती. त्याचवेळी वाशी पोलिसांनी छापा टाकला. वरिष्ठ पोलिस निरीक्षक शशिकांत चांदेकर यांच्या मार्गदर्शनाखाली कारवाईप्रकरणी गुन्हा दाखल करण्यात आला आहे.