हुतात्मा भाई कोतवाल व हिराजी पाटील यांना अभिवादन

हुतात्मा भाई कोतवाल व हिराजी पाटील यांना अभिवादन
माणिवली येथे ८३वा स्मृतिदिन उत्साहात
कर्जत, ता. ३ (बातमीदार) : भारतीय स्वातंत्र्यलढ्यातील क्रांतिकारक हुतात्मा भाई कोतवाल व हुतात्मा हिराजी गोमाजी पाटील यांच्या ८३व्या स्मृतिदिनानिमित्त माणिवली येथील हुतात्मा हिराजी पाटील स्मारकात अभिवादन करण्यात आले. कर्जत पंचायत समिती शिक्षण विभाग, हुतात्मा स्मारक समिती व ग्रामपंचायत माणिवली यांच्या पुढाकारातून हा कार्यक्रम पार पडला.
राज्याचे रोजगार हमी योजना मंत्री भरत गोगावले यांच्या हस्ते हुतात्मा हिराजी पाटील यांच्या अर्धपुतळ्यास पुष्पहार अर्पण करून मशाल पेटवण्यात आली. या वेळी आमदार महेंद्र थोरवे, प्रांताधिकारी प्रकाश संकपाळ, तहसीलदार डॉ. धनंजय जाधव, गटविकास अधिकारी सुशांत पाटील, गटशिक्षण अधिकारी अनंत खैरे, सहाय्यक पोलिस निरीक्षक राहुल वरोटे व हुतात्म्यांचे वारस विठ्ठल पाटील उपस्थित होते.
या वेळी मार्गदर्शन करताना मंत्री गोगावले यांनी क्रांतिकारकांच्या स्मृती जपण्याचे आवाहन केले. आमदार महेंद्र थोरवे यांनी स्मारक विकासासाठी ५० लाख रुपयांची तरतूद जाहीर केली.