प्रतिबंधित गुटख्यासह एकाला अटक

प्रतिबंधित गुटख्यासह एकाला अटक
सकाळ वृत्तसेवा
ठाणे, ता. ४ ः महाराष्ट्रात प्रतिबंधित असलेल्या गुटखा आणि सुगंधित तंबाखू विक्रीसाठी बाळगणाऱ्या एकाला ठाणे गुन्हे शाखा एकच्या पथकाने पकडले आहे. कळव्यातील राजेश यादव (४५) असे त्याचे नाव असून त्याच्याकडून सुमारे एक लाख ३६ हजारांचा गुटखा व सुगंधित तंबाखू जप्त केला आहे. त्याने तो मुद्देमाल एक दिवसांपासून कुर्ला येथून खरेदी केल्याचे चौकशीत समोर आले आहे.
पोलिस उपनिरीक्षक दीपक घुगे यांना भास्करनगर येथील नागरी आयुष्यमान आरोग्य मंदिराजवळील एका गाळ्यात प्रतिबंधित गुटखा व सुगंधित तंबाखू विक्री करण्याकरिता बाळगल्याची माहिती मिळाली होती. त्यानुसार वरिष्ठ पोलिस निरीक्षक सचिन गायकवाड यांच्या मार्गदर्शनाखाली दीपक घुगे यांच्या पथकाने शनिवारी (ता. ३) सापळा रचून राजेश यादव याला ताब्यात घेतले. तो गाळा राजेश याने पाच महिन्यापूर्वी भाडेतत्वावर घेतला आहे. त्या गाळ्यात डायपर बॉक्स आणि कोल्ड्रिंक बाटल्यांच्या बॉक्सच्यामागे प्लास्टिक गोणीमध्ये गुटखा व सुगंधित तंबाखू असा एकूण एक लाख ३५ हजार ३०६ रुपयांचे किंमतीचा मुद्देमाल ठेवला होता. याप्रकरणी राजेशवर विविध कलमान्वये गुन्हा दाखल करण्यात आला असून अटक करण्यात आली आहे.