क्रिकेट स्पर्धेत पेण स्पोर्ट्स असोसिएशन विजयी

क्रिकेट स्पर्धेत पेण स्पोर्ट्स असोसिएशन विजयी
अंतिम सामन्यात प्रोफेशनल क्रिकेट अकॅडमीवर सहा धावांनी मात
पोयनाड, ता. ४ (बातमीदार) : रायगड जिल्हा क्रिकेट असोसिएशनच्या वतीने आयोजित वरिष्ठ गटाच्या ४० षटकांच्या निवड चाचणी एकदिवसीय क्रिकेट स्पर्धेत पेण स्पोर्ट्स असोसिएशन संघाने प्रोफेशनल क्रिकेट अकॅडमी, खारघर संघावर अंतिम सामन्यात सहा धावांनी विजय मिळवत विजेतेपद पटकावले.
पेण येथील छत्रपती शिवाजी महाराज मैदानावर झालेल्या अंतिम सामन्यात प्रथम फलंदाजी करताना पेण संघाने ३५.५ षटकांत २२८ धावा केल्या. अभिषेक खातू (५८), ऋषिकेश नाईक (३९), अभिषेक जैन (३७) व प्रतीक म्हात्रे (२४) यांनी मोलाची कामगिरी केली. खारघरकडून सत्यम कुमारने पाच तर हितेश नलावडेने चार बळी घेतले.
२२९ धावांच्या लक्ष्याचा पाठलाग करताना श्रेयस कुमारने ११७ धावांची झुंजार खेळी केली; मात्र विनीत भोईरच्या निर्णायक गोलंदाजीमुळे पेण संघाने सामना जिंकला. मालिकावीर अभिषेक खातू ठरला.