अलिबाग कोळीवाडा ते पाली बल्लाळेश्वर पदयात्रा

अलिबाग कोळीवाडा ते पाली बल्लाळेश्वर पदयात्रा
अलिबाग, ता. ५ (वार्ताहर) : कोळीवाडा येथील वाल्मीकी जलसा मित्रमंडळाच्या वतीने अलिबाग कोळीवाडा ते श्री क्षेत्र पाली बल्लाळेश्वर अशी भव्य पदयात्रा पालखी सोहळ्याचे आयोजन करण्यात आले आहे. या उपक्रमाचे हे दुसरे वर्ष असून ४ ते ६ जानेवारी या कालावधीत हा भक्तिमय सोहळा उत्साहात होत आहे.
या पदयात्रेत कोळीवाडा परिसरातील महिला, पुरुष, युवक तसेच ज्येष्ठ नागरिक मोठ्या संख्येने सहभागी झाले आहेत. श्रीगणेशाच्या जयघोषात, टाळ-मृदुंगाच्या गजरात आणि अभंग-भजनांच्या सुरेल नादात संपूर्ण मार्ग भक्तिरसाने भारून गेला. विधिवत पूजन करून पालखीला प्रारंभ करण्यात आला.
मार्गक्रमणादरम्यान विविध गावांतील ग्रामस्थांनी भाविकांचे स्वागत करीत पाणी, अल्पोपाहार व विश्रांतीची उत्तम व्यवस्था केली. शिस्तबद्ध नियोजन, स्वयंसेवकांचे सहकार्य व मंडळाच्या सदस्यांची मेहनत यामुळे पदयात्रा सुरक्षित व सुरळीत पार पडली. विशेषतः महिलांचा उत्स्फूर्त सहभाग हे या पदयात्रेचे प्रमुख आकर्षण ठरले.