कल्याण डोंबिवलीत पोलिस यंत्रणा सज्ज

कल्याण डोंबिवलीत पोलिस यंत्रणा सज्ज

कल्याण, ता. ५ (वार्ताहर) : कल्याण-डोंबिवली महापालिका निवडणुकीच्या पार्श्वभूमीवर परिमंडळ-३ कल्याण अंतर्गत कायदा व सुव्यवस्था अबाधित राखण्यासाठी पोलिस प्रशासनाने व्यापक आणि कडेकोट बंदोबस्ताची अंमलबजावणी केली आहे. उपायुक्त अतुल झेंडे यांनी दिलेल्या माहितीनुसार, निवडणूक प्रक्रिया शांततेत आणि निर्भय वातावरणात पार पडावी यासाठी विविध प्रतिबंधात्मक कारवाईचे उपाय राबविण्यात आले आहेत.
३४४ मतदान केंद्रे आणि १,४५७ मतदान बूथवर मतदानाच्या दिवशी चोख बंदोबस्त ठेवण्यात येणार आहे. विविध पथके तैनात करण्यात आली आहेत.
निवडणूक काळात सुरक्षेच्या दृष्टीने मोठ्या प्रमाणात शस्त्र जमा करण्यात आली आहेत. बँक आणि इतर संस्थांकडील शस्त्रांसह एकूण १,३०१ शस्त्रांपैकी १,११० शस्त्र जमा करण्यात आली असून उर्वरित शस्त्रांवर देखरेख ठेवण्यात आली आहे. अवैध दारू, अमली पदार्थ, शस्त्रे यांच्याविरोधात विशेष मोहीम राबविण्यात आली. अनेक आरोपींना अटक करण्यात आली आहे.