काँग्रेसचा हात विकासासोबत

काँग्रेसचा हात विकासासोबत
मिरा-भाईंदर महापालिकेसाठी जाहीरनामा प्रसिद्ध
भाईंदर, ता. ७ (बातमीदार) : नागरी समस्यांशी संबंधित विकासाचा जाहीरनामा काँग्रेसकडून सादर करण्यात आला आहे. सत्ताधारी पक्ष विकासकामे करण्यात अपयशी ठरले आहेत. काँग्रेस सत्तेत आल्यानंतर विकासकामांना प्राधान्य देण्यात येईल, असे आश्वासन देण्यात आले आहे.
आगामी मिरा-भाईंदर महापालिका निवडणुकीसाठी काँग्रेसने जनहित, विकास आणि सुशासनवर आधारित जाहीरनामा प्रसिद्ध केला. या वेळी प्रामुख्याने पिण्याचे पाणी, खड्डेमुक्त रस्ते, मेट्रो प्रकल्पाची पूर्तता, विकास आराखड्याची अंमलबजावणी, सक्षम वाहतूक व्यवस्था, टोलनाका स्थलांतरण, शास्त्रोक्त पद्धतीने कचरा व्यवस्थापन, भूमिगत गटार योजना, स्वच्छ भाजी मंडई, पार्किंग सुविधा, आधुनिक आरोग्य सेवा व सार्वजनिक शौचालये यांना प्राधान्य देण्यात आले आहे. त्याचप्रमाणे महिला सक्षमीकरण, क्रीडांगणांचा विकास, सुदृढ कायदा व सुव्यवस्था, सायबर गुन्ह्यांवर नियंत्रण, पर्यावरण संरक्षण व हरित शहर अभियान यावरही जाहीरनाम्यात विशेष भर देण्यात आला आहे.
---------------------------------------
गेल्या महापालिका निवडणुकीत मेट्रो, सूर्या पाणी योजना लवकरात लवकर कार्यान्वित करण्याचे आश्वासन देण्यात आले होते; मात्र आठ वर्षांनंतरही योजना अपूर्ण आहेत. त्यामुळे आगामी काळात रखडलेल्या योजना पूर्ण करण्याचा काँग्रेसचा संकल्प आहे.
- मुझफ्फर हुसेन, वरिष्ठ उपाध्यक्ष, काँग्रेस