कार्यकर्त्यांनी जोर लावल्यास विरोधकांना एकही जागा मिळणार नाही - खासदार डॉ. श्रीकांत शिंदे

कार्यकर्त्यांनी जोर लावल्यास विरोधकांना एकही जागा मिळणार नाही
कल्याण पश्चिम विधानसभेत खासदार डॉ. श्रीकांत शिंदे यांचा झंजावती दौरा
कल्याण, ता. ७ (वार्ताहर) : कल्याण-डोंबिवलीत शिंदे गट-भाजपाचे २० उमेदवार बिनविरोध निवडून आले आहेत. सगळीकडे शिवसेना-भाजपाचे तगडे उमेदवार असून दोन्ही पक्षांच्या कार्यकर्त्यांनी आणखी जास्त काम केल्यास एकही विरोधक निवडून येणार नाही, असा विश्वास कल्याण लोकसभेचे खासदार डॉ. श्रीकांत शिंदे यांनी व्यक्त केला. टिटवाळा येथे मंगळवारी (ता. ६) आयोजित बैठकीत कार्यकर्त्यांशी संवाद साधतांना शिंदे यांनी कार्यकर्त्यांना हे आवाहन केले. यावेळी शिवसेना जिल्हा प्रमुख अरविंद मोरे, शहर प्रमुख रवी पाटील, भाजपा मंडळाध्यक्ष शक्तिवान भोईर, प्रभाग क्रमांक तीनचे उमेदवार संतोष तरे, उपेक्षा भोईर, हर्षाली चौधरी, बंदेश जाधव यांच्यासह पदाधिकारी, कार्यकर्ते उपस्थित होते.
कल्याण-डोंबिवली महानगरपालिका निवडणुकीच्या पार्श्वभूमीवर प्रभाग क्रमांक एक ते १० या प्रभागांमध्ये श्रीकांत शिंदे यांनी दौरा करून स्थानिक पदाधिकारी, कार्यकर्ते आणि प्रामुख्याने शिवसेना, भाजपा, रिपाइं महायुतीचे नगरसेवक पदाचे अधिकृत उमेदवारांशी संवाद साधला आणि प्रभागातील प्रचाराबाबत आढावा घेतला. महायुतीच्या माध्यमातून विकासाची कामे सुरू आहेत. तीन नंबर पॅनलमध्ये अनुभवी लोकं असून त्यांनी टिटवाळा येथे चांगले काम केले आहे. महायुतीच्या माध्यमातून रिंगरोड, सॅटिस, मेट्रो आणि इतर अनेक कामे सुरू आहेत. तिकिटे न मिळाल्याने अनेक जण पक्ष सोडून गेले आहेत. मात्र, या निवडणुकीचा निकाल लागल्यानंतर ते सर्व पुन्हा परत येतील. पक्षासाठी जो कार्यकर्ता काम करतो पक्ष त्याची जाण ठेवतो. त्यामुळे जास्तीत जास्त काम करून सर्व उमेदवार निवडून आणा, असे आवाहन श्रीकांत शिंदे यांनी यावेळी केले.