तीन टेम्पोसह ५५ लाखांचा गुटखा जप्त

भिवंडी, ता. ७ (बातमीदार) : महाराष्ट्रात बंदी असलेल्या गुटख्याची भिवंडी परिसरातून मोठ्या प्रमाणात तस्करी सुरू असल्याचे पुन्हा एकदा उघडकीस आले आहे. भिवंडी गुन्हे शाखेच्या वरिष्ठ पोलिस निरीक्षक शीतल राऊत यांनी पदभार स्वीकारताच मिळालेल्या माहितीनुसार त्यांच्या नेतृत्वाखाली करण्यात आलेल्या कारवाईत सुमारे ५५ लाख रुपयांचा बंदी घातलेला गुटखा जप्त करण्यात आला आहे.
पोलिसांनी दिलेल्या माहितीनुसार, पोलिस उपायुक्तांच्या कार्यक्षेत्रात गुन्हे शाखेचे कर्मचारी गस्त घालत होते. त्या वेळी भादवड रोडवरून कल्याण नाक्याकडे मोठ्या प्रमाणात गुटखा नेला जाणार असल्याची माहिती पोलिस हवालदार विजय कुंभार यांना मिळाली. या माहितीच्या आधारे वरिष्ठ निरीक्षक शीतल राऊत यांच्या मार्गदर्शनाखाली सहाय्यक निरीक्षक श्रीराज माळी, मिथुन भोईर आणि उपनिरीक्षक रवींद्र पाटील यांच्या पथकाने आजबीबी मस्जिद रोड परिसरात सापळा रचला. तपासादरम्यान संशयास्पद दोन टेम्पो आणि ट्रकला थांबवून झडती घेण्यात आली. या तिन्ही वाहनांमधून एकूण ५४ लाख ९९ हजार रुपयांचा गुटखा आढळून आला. याशिवाय २० लाख रुपये किमतीची वाहने जप्त करण्यात आली आहे. एकूण जप्त मालाची किंमत ७७ लाख ९९ हजार रुपये इतकी आहे. याप्रकरणी पोलिसांनी टेम्पोचालक संजय म्हसकर, अक्षय गुडेकर आणि अझीम वाहिद शेख यांना ताब्यात घेऊन त्यांच्याविरोधात भिवंडी शहर पोलिस ठाण्यात गुन्हा दाखल केला आहे. घटनेचा पुढील तपास सहाय्यक पोलिस निरीक्षक श्रीराज माळी करीत आहेत.