हार्बर मार्गावर एसी लोकल पुन्हा सुरू होणार

‘हार्बर’वर एसी लोकल पुन्हा सुरू होणार
प्रवासी वाढ, विमानतळामुळे मध्य रेल्वेचा निर्णय

सकाळ वृत्तसेवा
मुंबई, ता. ७ : हार्बर मार्गावर प्रवासी संख्येत झपाट्याने होत असलेली वाढ आणि नवी मुंबई आंतरराष्ट्रीय विमानतळामुळे निर्माण होणारी नवी वाहतूक व्यवस्था लक्षात घेता, मध्य रेल्वेने एसी लोकल पुन्हा सुरू करण्याचा निर्णय घेतला आहे. या संदर्भातील प्रस्ताव मुख्यालयाकडे पाठविण्यात आला असून, मंजुरी मिळाल्यास येत्या दीड महिन्यात एसी लोकल सेवा सुरू होण्याची शक्यता आहे.
सीएसएमटी ते पनवेलदरम्यानचा हार्बर मार्ग हा नवी मुंबईचा मुख्य प्रवासी दुवा मानला जातो. गेल्या काही वर्षांत वाशी, नरूळ, सीवूड, बेलापूर आणि पनवेल परिसरात कार्यालये, व्यावसायिक संकुले आणि निवासी प्रकल्प वाढले आहेत. त्यामुळे सकाळ-संध्याकाळच्या वेळेत लोकलमध्ये प्रचंड गर्दी होते. यापूर्वी हार्बर मार्गावर एसी लोकल चालविण्यात आली होती; मात्र त्या वेळी प्रवासी भार मर्यादित असल्याने सेवा स्थगित करण्यात आली. सध्या परिस्थिती बदलली असून, खारकोपर ते नेरूळ-सीवूड जोडणीमुळे हार्बर मार्गाची उपयुक्तता मोठ्या प्रमाणात वाढली आहे. नवी मुंबई आंतरराष्ट्रीय विमानतळ सुरू झाल्यानंतर या मार्गावरून विमान प्रवाशांची संख्या वाढणार आहे. प्रवास अधिक सुरक्षित, स्वच्छ आणि आरामदायी राहावा, या उद्देशाने एसी लोकलचा पर्याय पुन्हा सुरू करण्याचा निर्णय घेण्यात आला आहे.
...
आठ एसी लोकल सज्ज
मध्य रेल्वेच्या ताफ्यात सध्या आठ एसी लोकल उपलब्ध आहेत. यातील एक नवी एसी लोकल नुकतीच चेन्नईतील इंटिग्रल कोच फॅक्टरीतून दाखल झाली आहे. उपलब्ध ताफ्याचा वापर करून हार्बर मार्गावर टप्प्याटप्प्याने एसी लोकल चालविण्यात येणार असल्याची माहिती मध्य रेल्वेच्या अधिकाऱ्यांनी दिली आहे.
...
अंतिम मंजुरीनंतर वेळापत्रक
एसी लोकल सुरू करण्याबाबतचा प्रस्ताव मध्य रेल्वेच्या ऑपरेशन्स विभागाकडून मुख्यालयाकडे पाठविण्यात आला आहे. मंजुरी मिळाल्यानंतर एसी लोकलचे मार्ग, फेऱ्या आणि वेळापत्रक जाहीर करण्यात येणार असल्याची माहिती मध्य रेल्वेच्या एका वरिष्ठ अधिकाऱ्याने ‘सकाळ’ला दिली.