डॉ. किरण सावे यांना प्राचार्य शिवाजीराव भोसले आदर्श शिक्षक पुरस्कार

डॉ. किरण सावे यांना आदर्श शिक्षक पुरस्कार

मनोर, ता. १० (बातमीदार) : महाराष्ट्र तत्त्वज्ञान परिषद व प्रा. डॉ. नवनाथ रासकर यांच्या सौजन्याने पालघरच्या सोनोपंत दांडेकर महाविद्यालयाचे प्राचार्य डॉ. किरण सावे यांना ''प्राचार्य शिवाजीराव भोसले आदर्श शिक्षक पुरस्कार'' प्रदान करण्यात आला. महाराष्ट्र तत्त्वज्ञान परिषदचे ४१वे राज्यस्तरीय अधिवेशन छत्रपती संभाजीनगर येथील एमजीएम विद्यापीठात संपन्न झाले. ज्येष्ठ तत्त्वज्ञान-अभ्यासक डॉ. मोहनराव देशमुख हे या अधिवेशनाचे अध्यक्ष होते. या अधिवेशनात मुंबई विद्यापीठाचे माजी कुलगुरू डॉ. संजय देशमुख, आयसीटी मुंबई विद्यापीठाचे कुलगुरू पद्मभूषण डॉ. ज्येष्ठराज जोशी, पुणे विद्यापीठातील डॉ. आनंद अभ्यंकर आदि मान्यवरांच्या उपस्थितीत प्राचार्य डॉ. किरण सावे यांना आदर्श शिक्षक हा पुरस्कार देण्यात आला. व्यासंग, जिज्ञासा, संशोधनवृत्ती, प्रशासकीय काम व लेखनकार्य याची दखल घेऊन डॉ. सावे यांना हा पुरस्कार दिला गेला.