खुडेद प्रीमियर लीग उत्साहात संपन्न

खुडेद प्रीमियर लीगला चांगला प्रतिसाद

विक्रमगड, ता. १० (बातमीदार) : खुडेद प्रीमियर लीग (केपीएल) तर्फे आयोजित क्रिकेट स्पर्धा मोठ्या उत्साहात पार पडली. या स्पर्धेत आठ संघांनी सहभाग नोंदवला होता. ग्रामीण भागातील होतकरू क्रिकेटपटूंना हक्काचे व्यासपीठ मिळावे, या उद्देशाने आयोजित करण्यात आलेल्या या लीगला क्रिकेटप्रेमींकडून ही चांगला प्रतिसाद मिळाला.
स्पर्धेचा अंतिम सामना कुंदन इलेव्हन आणि आर. पी. लॉयन या दोन बलाढ्य संघांमध्ये रंगला. अत्यंत चुरशीच्या व रोमहर्षक लढतीत, कुंदन इलेव्हन संघाने विजय मिळवत विजेतेपदाचा चषक पटकावला. स्पर्धेच्या वैयक्तिक पारितोषिकांमध्ये मालिकावीर म्हणून नितेश गांगोडा, उत्कृष्ट फलंदाज म्हणून कैलास म्हसे, उत्कृष्ट गोलंदाज म्हणून अनिल काकवा आणि स्टायलिश प्लेअर म्हणून प्रदीप पाडवी यांना गौरविण्यात आले. या स्पर्धेसाठी ग्रामपंचायत खुडेदचे सरपंच लहू रामू नडगे, उपसरपंच अंकुश रामू गभाले तसेच ग्रामपंचायत अधिकारी कविता विष्णू कोंगिल प्रमुख पाहुणे म्हणून उपस्थित होते.