डॉ. पतंगराव कदम यांना वैचारिक आदरांजली

डॉ. पतंगराव कदम यांना वैचारिक आदरांजली
बेलापूर येथे ‘महाराष्ट्र : कालचा आणि आजचा’वर व्याख्यान

उलवे, ता. १० (बातमीदार) : भारती विद्यापीठाचे संस्थापक व कुलपती डॉ. पतंगराव कदम यांच्या स्मृतिदिनानिमित्त व्याख्यानमालेतून त्यांना वैचारिक आदरांजली वाहण्यात आली. बेलापूर येथील भारती विद्यापीठ संचालित महाविद्यालयात ‘महाराष्ट्र : कालचा आणि आजचा’ या विषयावर व्याख्यान पार पडले. याप्रसंगी ‘सकाळ’चे मुख्य संपादक राहुल गडपाले यांनी कदम यांच्या विचारांचा आदर्श तरुणांनी घ्यावा, असे प्रतिपादन केले.

डॉ. पतंगराव कदम यांच्या स्मृतिप्रीत्यर्थ बेलापूर सेक्टर ३ येथील भारती विद्यापीठाच्या हॉटेल मॅनेजमेंट संकुलात शुक्रवारी (ता. ९) आयोजित व्याख्यानमालेचा लाभ घेण्यासाठी प्राध्यापक आणि विद्यार्थी मोठ्या संख्येने उपस्थित होते. व्याख्यानमालेत बोलताना गडपाले यांनी महाराष्ट्राच्या सामाजिक, राजकीय व सांस्कृतिक वाटचालीचा सखोल आढावा घेत प्रत्येक महाराष्ट्रीयन व्यक्तीने आता अभ्यासपूर्ण व विचारप्रवर्तक राहण्याची गरज असल्याचे सांगितले.

कार्यक्रमाची सुरुवात डॉ. पतंगराव कदम यांच्या प्रतिमापूजनाने झाली. प्राध्यापक आर. एच. कदम यांच्या हस्ते कार्यक्रमाचे उद्घाटन करण्यात आले. भारती विद्यापीठ प्रशाला व ज्युनिअर कॉलेजच्या प्राचार्य निकिता खानविलकर यांनी कार्यक्रमाचे सूत्रसंचालन आणि समन्वय केले.