जव्हार शहरात भूगर्भातुन हादरा ; भूकंप की हादरा अद्याप स्पष्टता नाही

जव्हारमध्ये भूकंप की हादरा?
सुट्टीमुळे अधिकृत माहिती नाही
जव्हार, ता. १० (बातमीदार) ः शहर तथा बालकापरा, डेंगाची मेट येथे शनिवारी दुपारी १.४६ वाजता भूगर्भातून जोरदार हादरा जाणवला. साधारण चार सेकंदांपर्यंत हा हादरा जाणवला होता. नागरिक भयभीत होऊन घराबाहेर निघाले; मात्र या धक्क्याबाबत संभ्रम निर्माण झाला आहे. हा धक्का भूकंपाचा की भूगर्भातील हादरा, याबाबत शनिवार आणि रविवारी सुट्टी असल्याने तहसील कार्यालयातून तशी अधिकृत माहिती मिळली नाही.
२०१२ पासून सलग तीन ते चार वर्षे जव्हार तालुक्यात छोटे-मोठे भूकंपाचे धक्के जाणवत होते; मात्र नंतर ते बंद झाले. दरम्यान, मागील दोन ते तीन वर्षांपासून तलासरी व डहाणू भागात भूकंपाचे धक्के सुरू आहेत. यात एखादा धक्का अतितीव्र असल्यास त्याचा हादरा जव्हारला अल्प प्रमाणात जाणवतो; मात्र याबाबत मेरीला नोंद झाली की नाही हे सुट्टी असल्यामुळे समजले नाही. हे धक्के भूकंपाचे नसून भूगर्भातील हालचालींचा आहे, असे निष्पन्न झाल्याचे तत्कालीन तहसीलदार संतोष शिंदे यांनी त्या वेळी स्पष्ट केले होते. तालुक्याच्या आजूबाजूला असलेली धरणे आणि त्यातील पाणीसाठा हेदेखील भूगर्भातील धक्के व हालचालींना कारणीभूत ठरू शकतात, असे तालुक्यातील नागरिक बोलत आहेत.
------------------
भूगर्भातील हादऱ्यांबाबत जिल्ह्यावरून अद्याप तशी माहिती प्राप्त झालेली नाही. नागरिकांनी भयभीत होऊ नये.
- लता धोत्रे, तहसीलदार, जव्हार