सानपाडा येथे शिंदे गटाला खिंडार

जुईनगर, ता. १० (बातमीदार) : मतदानाला केवळ चार दिवस राहिले असताना नवी मुंबई महापालिका निवडणुकीदरम्यान शिंदे गटाला धक्का बसला आहे. सानपाडा येथील प्रभाग क्रमांक १९ मधील शहरप्रमुखासह २० पेक्षा अधिक पदाधिकाऱ्यांनी पदाचे राजीनामे दिले आहेत. शिवसेना शिंदे गटाचे मिलिंद सूर्यराव यांच्या पत्नी शुभांगी यांना उमेदवारी नाकारल्यामुळे ते नाराज होते. त्यांनी आपल्या सहकाऱ्यांसह सर्व पदांचा राजीनामा देत पक्षाला सोडचिठ्ठी दिली आहे. पुढील दोन दिवसांत आपली राजकीय भूमिका स्पष्ट करणार असल्याचे ते म्हणाले. शिवसेना शिंदे गटाकडून सोमनाथ वास्कर यांच्या एकाच कुटुंबातील तीन जणांना उमेदवारी दिल्याने पक्षाने अन्याय केल्याची भावना सूर्यराव यांनी व्यक्त केली. सानपाडा विभागातील शिवसेनेमध्ये आणखी राजीनामे होणार असून, येत्या काही दिवसांत पक्षाला सानपाडा परिसरात अनेक हादरे बसणार असल्याचे सांगण्यात आले.