मुंबई तील पर्यटकाचा चिल्हार गावातील खदानीच्या पाण्यात बुडून मृत्यू

खदानीच्या पाण्यात बुडून एकाचा मृत्यू
मनोर, ता. १० (बातमीदार) ः मुंबई-अहमदाबाद महामार्गावरील चिल्हार गावाच्या हद्दीत पिकनिकसाठी आलेल्या समूहातील एकाचा खदानीतील पाण्यात बुडून मृत्यू झाला. फुजेल सय्यद (वय ३५) असे मृताचे नाव आहे. तो मुंबईतील माहीमचा रहिवासी होता.
शुक्रवारी (ता. ९) दुपारी मुंबईतील माहीम येथील पाच जणांचा समूह पिकनिकसाठी चिल्हार गावाच्या हद्दीत आला होता. ग्रीन फिल्ड पार्कमधील एका बंगल्यात त्यांचे वास्तव्य होते. शुक्रवारी संध्याकाळी ग्रीन फिल्डलगतच्या खदानीत पोहण्यासाठी गेले होते. फुजेल सय्यद याचा खदानीच्या पाण्यात बुडून मृत्यू झाला. ग्रामस्थ आणि पोलिसांनी मृतदेह बाहेर काढण्यासाठी प्रयत्न केले; परंतु मृतदेह हाती लागला नाही. शनिवारी (ता. १०) वसई-विरार महापालिकेच्या अग्निशमन दलाच्या जवानांना पाचारण करण्यात आले. तासाभराच्या प्रयत्नांनी मृतदेह शोधण्यात यश आले. याप्रकरणी मनोर पोलिस ठाण्यात अकस्मात मृत्यूची नोंद करण्यात आली आहे.