सैनिकांसाठी समाजाने पुढाकार घ्यावा : सुमेधा चिथडे

सैनिकांसाठी समाजाने पुढाकार घ्यावा : सुमेधा चिथडे
सैनिकांप्रती कृतज्ञता व्यक्त करण्यासाठी आर्थिक योगदानाची गरज
ठाणे, ता. ११ (बातमीदार) : देशाच्या सीमेवर प्रतिकूल परिस्थितीत तैनात असलेले भारतीय सैनिक प्रथम राष्ट्र या मूल्यावर आपले जीवन अर्पण करतात. अशा शूर जवानांप्रती कृतज्ञता व्यक्त करण्यासाठी समाजाने पुढाकार घेणे आवश्यक असल्याचे भावनिक आवाहन ‘सिर्फ’ (सोल्जर्स इंडिपेंडंट रिहॅबिलिटेशन फाउंडेशन)च्या सुमेधा चिथडे यांनी केले. ठाण्याच्या नौपाडा येथील सरस्वती क्रीडा संकुलाच्या मैदानात आयोजित ४० व्या रामभाऊ म्हाळगी स्मृती व्याख्यानमालेत त्या बोलत होत्या.
‘राष्ट्रायस्वाहाः इदं न मम - भारतीय सैन्य आणि त्यांचे राष्ट्राप्रती योगदान’ या विषयावर सादर झालेल्या तिसऱ्या पुष्पात त्यांनी गेल्या २६ वर्षांपासून सियाचिन व कुपवाडा येथे भारतीय सैन्यासाठी प्राणवायू युनिट्स उभारण्याच्या कार्याचा आढावा घेतला. सियाचिनसारख्या दुर्गम भागात ‘सिर्फ’ फाउंडेशनच्या माध्यमातून ऑक्सिजन जनरेशन प्लांट उभारण्यात आल्याची माहिती देताना उपस्थितांमध्ये राष्ट्रप्रेमाची भावना दाटून आली. या कार्यक्रमास आमदार संजय केळकर, सत्राध्यक्ष कॅप्टन चंद्रशेखर वारळकर, माधुरी ताम्हाणे व्यासपीठावर उपस्थित होते. संजय केळकर यांच्यासोबत श्रोत्यांनीही उत्स्फूर्त प्रतिसाद देत आर्थिक योगदान दिले. यावेळी सीए शेखर कुलकर्णी, सीए जयदीप सहस्त्रबुद्धे आणि सीए विनोद करंदीकर यांचा सत्कार करण्यात आला.
सुमेधा चिथडे यांनी ध्वनीचित्रफिती आणि पॉवरपॉईंट सादरीकरणाद्वारे सैनिकांसाठी राबविण्यात येणाऱ्या विविध कल्याणकारी योजनांची माहिती दिली. छत्रपती शिवाजी महाराज, वीर सावरकर आणि महर्षी कर्वे यांच्या उदाहरणांतून राष्ट्रसेवेची प्रेरणा देत त्यांनी प्रत्येक नागरिकाने आपल्या आनंदाच्या प्रसंगातून यथाशक्ती आर्थिक समिधा अर्पण करावी, असे आवाहन केले.