मुंब्र्यात मराठीची सक्ती करून दाखवावी

मुंब्र्यात मराठीची सक्ती करून दाखवावी
कृपाशंकर सिंह यांचे वादग्रस्त विधान
ठाणे, ता. ११ : आगामी महापालिका निवडणुकीच्या पार्श्वभूमीवर राजकीय आरोप-प्रत्यारोपांच्या फैरी झाडल्या जात असतानाच भाजप नेते कृपाशंकर सिंह यांनी केलेल्या एका विधानाने राजकीय वर्तुळात नवा वाद निर्माण होण्याची शक्यता आहे. ठाण्यातील निवडणूक प्रचारादरम्यान त्यांनी नाव न घेता उद्धव ठाकरे आणि राज ठाकरे यांच्यावर टीका केली.

शनिवारी रात्री महायुतीच्या प्रचारासाठी ठाण्यात आले असता माध्यमांशी बोलताना सिंह म्हणाले, ‘‘मुख्यमंत्री विकासाच्या मुद्द्यावर निवडणूक लढवत आहेत. मात्र दुसरीकडे काही लोक सर्वसामान्य फेरीवाल्यांना मराठीत बोलण्यासाठी धमकावत आहेत. जर त्यांच्यात हिंमत असेल तर त्यांनी मुंब्र्यासारख्या भागात जाऊन तिथल्या नागरिकांना मराठीत बोलण्याचे आव्हान देऊन पाहावे.

कृपाशंकर सिंह यांनी पुढे असेही नमूद केले, की विशिष्ट भागात जाऊन अशी सक्ती केल्यास त्यांना तीव्र विरोधाचा सामना करावा लागेल. काही दिवसांपूर्वी मिरा-भाईंदरमध्ये उत्तर भारतीय महापौर होईल, अशाच प्रकारचे विधान कृपाशंकर सिंह यांनी केले होते. आता ठाण्यातील या विधानामुळे शहरात पुन्हा एकदा ‘मराठी अस्मिता’ आणि ‘प्रादेशिक भाषा’ या विषयावरून राजकीय वातावरण तापण्याची चिन्हे आहेत. या वेळी बोलताना त्यांनी राज्यातील सर्व २९ महापालिकांमध्ये महायुतीचीच सत्ता येईल, असा ठाम विश्वास व्यक्त केला. दरम्यान, सिंह यांच्या या विधानावर आता शिवसेना (ठाकरे गट) आणि मनसेकडून काय प्रतिक्रिया येते, याकडे राजकीय धुरिणांचे लक्ष लागले आहे.